భారత యువ క్రికెటర్ వైభవ్ సూర్యవంశీ మరో అరుదైన ఘనత సాధించాడు. కేవలం 15 ఏళ్ల వయసులోనే పురుషుల టీ20 క్రికెట్ చరిత్రలో అత్యంత పిన్న వయస్కుడైన కెప్టెన్‌గా ప్రపంచ రికార్డు సృష్టించాడు. నవంబర్ 14న ఇండోర్‌లో సౌరాష్ట్రతో జరిగిన సయ్యద్ ముస్తాక్ అలీ ట్రోఫీ 2026 మ్యాచ్‌లో బిహార్ జట్టుకు సారథ్యం వహించాడు. అప్పటికి అతడి వయసు 15 ఏళ్ల 232 రోజులు. కెప్టెన్‌గా తొలి మ్యాచ్‌లో టాస్ గెలిచి బ్యాటింగ్ ఎంచుకున్నాడు.
రంజీ ట్రోఫీలో బిహార్ జట్టు వరుసగా నాలుగు మ్యాచ్‌ల్లో ఓడిన నేపథ్యంలో వైభవ్‌కు కెప్టెన్సీ బాధ్యతలు అప్పగించడం ఆసక్తికరంగా మారింది. అయితే ఈ టోర్నీలో అతడు ఒక్క మ్యాచ్ మాత్రమే ఆడి, అనంతరం ఎమర్జింగ్ ఆసియా కప్‌లో పాల్గొనే భారత జట్టుతో చేరనున్నాడు. తన సొంత రాష్ట్ర జట్టుకు నాయకత్వం వహించడం ప్రత్యేక అనుభూతినిచ్చిందని, ఈ అవకాశం కల్పించిన బోర్డుకు కృతజ్ఞతలు తెలిపాడు.
గతంలో దులీప్ ట్రోఫీలో ఈస్ట్ జోన్ జట్టుకు వైస్ కెప్టెన్‌గా వ్యవహరించిన వైభవ్.. కెప్టెన్ ఇషాన్ కిషన్ గాయంతో మైదానాన్ని వీడినప్పుడు జట్టును నడిపించాడు. ఆ టోర్నీలో ఈస్ట్ జోన్ విజేతగా నిలిచింది.
గత ఏడాది కాలంగా వైభవ్ తన బ్యాటింగ్‌తో క్రికెట్ ప్రపంచాన్ని ఆకట్టుకుంటున్నాడు. అండర్-19 ప్రపంచకప్ ఫైనల్లో ఇంగ్లండ్‌పై 175 పరుగులు చేసి భారత్ విజయంలో కీలక పాత్ర పోషించాడు. టోర్నీలో అద్భుత ప్రదర్శనకు ప్లేయర్ ఆఫ్ ది టోర్నమెంట్ అవార్డు అందుకున్నాడు.
ఐపీఎల్ 2026లో రాజస్థాన్ రాయల్స్ తరఫున 237.30 స్ట్రైక్ రేట్‌తో 776 పరుగులు చేసి ఆరెంజ్ క్యాప్ సాధించాడు. ఈ ప్రదర్శనతో భారత టీ20 జట్టులోనూ చోటు దక్కించుకుని, జూలైలో మాంచెస్టర్‌లో ఇంగ్లండ్‌తో జరిగిన మ్యాచ్‌లో అంతర్జాతీయ అరంగేట్రం చేశాడు. ఇప్పటివరకు జపాన్, ఇంగ్లండ్, జింబాబ్వేల్లో అంతర్జాతీయ టీ20 మ్యాచ్‌లు ఆడిన అతడు.. స్వదేశంలో మాత్రం ఇంకా ఆడలేదు.
ప్రొఫెషనల్ టీ20 క్రికెట్‌లో 44 మ్యాచ్‌లు ఆడిన వైభవ్.. బిహార్ తరఫున ఏడు మ్యాచ్‌ల్లో ప్రాతినిధ్యం వహించాడు. గత సీజన్‌లో మహారాష్ట్రపై 61 బంతుల్లో అజేయంగా 108 పరుగులు సాధించాడు.
ప్రస్తుతం న్యూజిలాండ్‌తో జరుగుతున్న వన్డే సిరీస్‌కు ఎంపికైన భారత జట్టులో అతడికి చోటు దక్కలేదు. త్వరలో జరిగే ఎమర్జింగ్ ఆసియా కప్‌లో భారత్ తరఫున ఆడనున్న వైభవ్.. ఆ తర్వాత విజయ్ హజారే ట్రోఫీలో బిహార్‌కు ప్రాతినిధ్యం వహించే అవకాశం ఉంది. 15 ఏళ్లకే ప్రపంచ రికార్డు సృష్టించిన ఈ యువ క్రికెటర్ భవిష్యత్తులో మరెన్ని ఘనతలు సాధిస్తాడో చూడాలి.
