మ‌న్యంలో త‌ప్ప‌ని డోలీలో మోత‌లు.. ప‌వ‌న్‌పై జ‌నం ఆగ్రహం

పార్వతీపురం మన్యం (Parvathipuram Manyam) జిల్లాలోని గుమ్మలక్ష్మీపురం (Gummalakshmipuram) మండలం చాపరాయి బిన్నీడి (Chaparai Binnidi) పంచాయతీలోని కొండ బిన్నీడి గ్రామంలో ఓ వృద్ధ గిరిజన మహిళ (Tribal Women) అనారోగ్యంతో బాధపడుతోంది. గ్రామానికి సరైన రహదారి (Road) లేకపోవడంతో ఆమెను కుటుంబ సభ్యులు డోలీ (Palanquin)లో మోసుకుని సుమారు 3 కిలోమీటర్ల దూరం వరకు తీసుకొచ్చి సమీపంలోని ఆరోగ్య కేంద్రానికి చేర్చారు. ఈ ఘటన స్థానిక గిరిజనులలో తీవ్ర ఆగ్రహాన్ని రేకెత్తించింది.

రహదారి లేక గిరిజనుల ఆవేదన
ఈ సమస్య మన్యం ప్రాంత గిరిజనులకు కొత్త కాదు. కుటుంబంలో ఎవ‌రైనా అనారోగ్యం బారిన పడినప్పుడు ఆసుపత్రి (Hospital)కి చేరడానికి డోలీలను ఆశ్రయించాల్సిన దుస్థితి ఇప్పటికీ కొనసాగుతోంది. గతంలో కూడా ఇలాంటి ఘటనలు చోటుచేసుకున్నాయి. అల్లూరి సీతారామరాజు (Alluri Sitarama Raju) జిల్లాలోని అనంతగిరి (Ananthagiri) మండలంలో గర్భిణీ స్త్రీ (Pregnant Women), అనారోగ్యంతో ఉన్న వృద్ధుడిని డోలీలో 3 కిలోమీటర్ల దూరం మోసుకెళ్లిన సంఘటన ఫిబ్రవరి 2025లో జ‌రిగింది. స్థానిక గిరిజనులు ఈ సమస్యపై ఐటీడీఏ (ITDA) అధికారులకు, ప్రజాప్రతినిధులకు ఎన్నోసార్లు వినతిపత్రాలు సమర్పించినప్పటికీ, ఫలితం శూన్యమని ఆవేదన వ్యక్తం చేస్తున్నారు. రహదారుల నిర్మాణానికి నిధులు మంజూరైనప్పటికీ, వాటి విడుదలలో జాప్యం కారణంగా పనులు పూర్తికాకపోవడం ఈ సమస్యకు ప్రధాన కారణంగా ఉందని వారు ఆరోపిస్తున్నారు.

ప‌వ‌న్‌ హామీలు: అమలు కాని వాగ్దానాలు
ఇటీవల ఆంధ్రప్రదేశ్ (Andhra Pradesh) ఉప ముఖ్యమంత్రి పవన్ కళ్యాణ్ (Pawan Kalyan) మన్యం జిల్లాలో పర్యటించి, గిరిజన గ్రామాల్లో రహదారుల నిర్మాణానికి హామీ ఇచ్చారు. మ‌న్యంలోని ఓ గ్రామస్తులకు చెప్పులు కూడా అందజేశారు. ఇకపై ప్రతీ 2 నెలలకు ఒకసారి 3 రోజులు ఇక్కడే ఉంటాన‌ని, ర‌హ‌దారుల‌న్నీ నిర్మిస్తామ‌ని చెప్పిన‌ప్ప‌టికీ.. నిర్మాణంలో పురోగతి కనిపించడం లేదని స్థానికులు విమర్శిస్తున్నారు. ఈ పరిస్థితి గిరిజన ప్రజలలో తీవ్ర అసంతృప్తిని కలిగిస్తోంది. స్వతంత్ర భారతదేశంలో ఇప్పటికీ గిరిజన ప్రాంతాల్లో డోలీలపై ఆధారపడే జీవన విధానం కొనసాగడం ప్రభుత్వ వైఫల్యాన్ని సూచిస్తోందని స్థానికులు ఆరోపిస్తున్నారు. “రహదారులు, ప్రాథమిక ఆరోగ్య సౌకర్యాలు లేకుండా అభివృద్ధి గురించి మాట్లాడడం వృథా” అని ఆగ్ర‌హం వ్య‌క్తం చేస్తున్నారు. మన్యం ప్రాంతంలోని గుమ్మలక్ష్మీపురం, కురుపం, పచిపెంట, సాలూరు వంటి మండలాల్లో ఇలాంటి సమస్యలు సర్వసాధారణంగా ఉన్నాయని, ప్రభుత్వం వీటిని గమనించకపోతే అభివృద్ధి శూన్యంగా మిగిలే ప్రమాదం ఉందని వారు హెచ్చరిస్తున్నారు.

సౌక‌ర్యాలు క‌ల్పించండి..
ఇటీవ‌ల మ‌న్యం ప్రాంతాల్లో వేసిన రోడ్డు ఒక్క వ‌ర్షానికి కారిపోయింద‌ని, కేవ‌లం ప్ర‌చార ఆర్భాటానికి త‌ప్ప‌.. రోడ్డు నిర్మాణంలో నాణ్య‌త ప్ర‌మాణాలు పాటించ‌డం లేద‌ని ఆగ్ర‌హం వ్య‌క్తం చేస్తున్నారు. గిరిజ‌న గ్రామాలంటే చిన్న‌చూపు ఎందుకుని ప్ర‌శ్నిస్తున్నారు. మన్యం ప్రాంత గిరిజనుల జీవన పరిస్థితులు మెరుగుపడాలంటే, రహదారులు, ఆరోగ్య సౌకర్యాలు, ఇతర ప్రాథమిక వసతులపై ప్రభుత్వం తక్షణ చర్యలు తీసుకోవాలని స్థానికులు డిమాండ్ చేస్తున్నారు. రహదారి లేక డోలీలపై ఆధారపడే ఈ దుస్థితిని నివారించడానికి, ప్రభుత్వం నిధుల విడుదలను వేగవంతం చేయాలని, రోడ్డు నిర్మాణ పనులను పూర్తి చేయాలని కోరుతున్నారు. గిరిజన ప్రాంతాల్లో అభివృద్ధి నిజమైన అర్థంలో సాకారం కావాలంటే, ఈ సమస్యలపై ప్రభుత్వం తక్షణ దృష్టి సారించాలని గిరిజన సమాజం ఆకాంక్షిస్తోంది.