జనసేన (Jana Sena) అధినేత, ఏపీ (Andhra Pradesh) డిప్యూటీ సీఎం పవన్ కల్యాణ్(Pawan Kalyan), అన్నా లెజ్నెవా (Anna Lezhneva) విడిపోతున్నట్లు ప్రకటించిన నేపథ్యంలో సోషల్ మీడియాలో జరుగుతున్న ట్రోలింగ్‌పై పవన్ మాజీ భార్య రేణూ దేశాయ్ (Renu Desai) స్పందించారు. వ్యక్తిగత జీవితంలో ఇబ్బందులు ఎదుర్కొంటున్న వారిని మరింత బాధపెట్టడం మానవత్వం కాదని పేర్కొన్నారు. ఒకరి వ్యక్తిగత జీవితాన్ని లక్ష్యంగా చేసుకుని విమర్శలు చేయడం సరికాదంటూ సోషల్ మీడియా వేదికగా సుదీర్ఘ పోస్ట్ చేశారు.
ఇప్పటికే బాధలో ఉన్న వ్యక్తిని మరింతగా దూషించడం, విమర్శించడం అమానవీయమని రేణూ దేశాయ్ పేర్కొన్నారు. సమాజంలో ఎంత ఉన్నతస్థాయిలో ఉన్నప్పటికీ ప్రతి ఒక్కరూ మనుషులేనని, వారికి కూడా కుటుంబాలు(Families), భావోద్వేగాలు (Emotions) ఉంటాయని గుర్తుచేశారు. ప్రతి వ్యక్తి ఎవరికో ఒకరికి బిడ్డ, తల్లిదండ్రులు లేదా తోబుట్టువు అనే విషయాన్ని మర్చిపోవద్దని సూచించారు.
మనమంతా ఎన్నో లోపాలతో కూడిన గాజు ఇళ్లలో(Glass Houses) జీవిస్తున్నామని, అలాంటప్పుడు ఇతరుల జీవితాలపై రాళ్లు విసరడం మానుకోవాలని రేణూ దేశాయ్ హితవు పలికారు. ఇతరులను విమర్శించే ముందు మనలోని లోపాలను (Flaws) గుర్తించుకోవాలని సూచించారు. ఆమె చేసిన ఈ వ్యాఖ్యలు సోషల్ మీడియాలో చర్చనీయాంశమయ్యాయి.
తన వ్యాఖ్యలను తప్పుగా అర్థం చేసుకోవద్దని రేణూ దేశాయ్ స్పష్టం చేశారు. పవన్ కల్యాణ్‌కు మద్దతుగా మాట్లాడేందుకు తనకు ఎలాంటి ‘పేటీఎం'(Paytm) డబ్బులు అందలేదని వ్యంగ్యంగా వ్యాఖ్యానించారు. సానుభూతి, దయ ప్రతి మనిషిలో ఉండాల్సిన కనీస లక్షణాలని పేర్కొన్నారు. తన మెదడులోని ‘ప్రీ ఫ్రంటల్ కార్టెక్స్’ (Prefrontal Cortex) సరిగ్గా పనిచేస్తోందని, అందుకే ఒక మనిషిగా స్పందించగలుగుతున్నానని తనదైన శైలిలో ట్రోలర్స్‌కు కౌంటర్ ఇచ్చారు.
తన వ్యాఖ్యలపై అనవసర ఊహాగానాలు చేయవద్దని కోరారు. పవన్ కల్యాణ్ వ్యక్తిగత జీవితంపై ట్రోలింగ్ కొనసాగుతున్న సమయంలో రేణూ దేశాయ్ చేసిన ఈ పోస్ట్ నెట్టింట వైరల్‌గా మారింది.
