గోల్డ్ స్మగ్లింగ్ కేసులో (Gold Smuggling Case) కన్నడ నటి రన్యా రావుకు (Ranya Rao) కస్టమ్స్ అధికారులు (Customs Officials) బిగ్ షాక్ ఇచ్చారు. నిబంధనలను అతిక్రమించి విదేశాల నుంచి భారీగా బంగారాన్ని అక్రమ రవాణా చేసినందుకు గాను ఆమెకు రూ. 89.91 కోట్ల జరిమానా విధిస్తూ కస్టమ్స్ శాఖ (Customs Department) తాజాగా సంచలన ఆదేశాలు జారీ చేసింది. కస్టమ్స్ జాయింట్ డైరెక్టర్ సందీప్ (Sandeep) నేతృత్వంలో రూపొందించిన 399 పేజీల సమగ్ర ఉత్తర్వుల్లో రన్యాతో పాటు ఈ ముఠాలోని మరో ముగ్గురికి కలిపి మొత్తం రూ. 244 కోట్లకు పైగా పెనాల్టీ విధించారు.
రూ.12.56 కోట్ల బంగారంతో దొరికిపోయి..
2025 మార్చి 3న దుబాయ్ నుంచి బెంగళూరులోని కెంపేగౌడ అంతర్జాతీయ విమానాశ్రయానికి (Kempegowda International Airport) చేరుకున్న రన్యా రావును డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు తనిఖీ చేశారు. ఆ సమయంలో ఆమె వద్ద ఉన్న 14.213 కిలోల విదేశీ బంగారాన్ని స్వాధీనం చేసుకున్నారు. ఆ బంగారం విలువ సుమారు రూ. 12.56 కోట్లుగా అధికారులు నిర్ధారించారు.
అంతటితో ఆగకుండా ఆమె నివాసంలోనూ సోదాలు నిర్వహించగా, లెక్కల్లో చూపని రూ. 2.67 కోట్ల నగదుతో పాటు రూ. 2.06 కోట్ల విలువైన బంగారు ఆభరణాలు బయటపడ్డాయి. అధికారులు లోతుగా విచారించగా, ఏడాది వ్యవధిలోనే ఈ ముఠా దాదాపు 113 కిలోల బంగారాన్ని అక్రమంగా భారత్‌కు తరలించినట్లు నిర్ధారణ అయింది.
మిగతా నిందితులకు రూ. 155 కోట్ల షాక్!
ఈ స్మగ్లింగ్ నెట్‌వర్క్‌లో రన్యా రావుకు సహకరించిన మరో ముగ్గురు నిందితులపైనా కస్టమ్స్ శాఖ కఠిన చర్యలు తీసుకుంది. తరుణ్ కొండూరు రాజు (Tarun Konduru Raju) రూ. 49.51 కోట్లు, సాహిల్ జైన్‌కు (Sahil Jain) రూ. 53.06 కోట్లు, భరత్ కుమార్ జైన్‌కు (Bharat Kumar Jain) రూ. 53.06 కోట్ల జరిమానా విధించింది.
ఏడాది పాటు జైలు జీవితం..
2025 మార్చిలో అరెస్టు అయిన రన్యా రావుకు కస్టమ్స్ కేసులో బెయిల్ లభించినప్పటికీ, విదేశీ మార్పిడి ద్రవ్య రక్షణ, అక్రమ రవాణా నిరోధక చట్టం (COFEPOSA – కోఫెపోసా) కింద కేంద్రం ఆమెను ఏడాది పాటు ముందస్తు నిర్బంధంలో ఉంచింది. ఈ నిర్బంధ ఉత్తర్వులను సుప్రీంకోర్టు కూడా సమర్థించడంతో, ఆమె పరప్పన అగ్రహార బెంగళూరు సెంట్రల్ జైలులోనే గడపాల్సి వచ్చింది. ఏడాది శిక్షా కాలం ముగియడంతో 2026 ఏప్రిల్ 22న ఆమె జైలు నుంచి బయటకు వచ్చారు.
జైలు నుంచి బయటకు వచ్చి కొన్ని నెలలు కాకముందే కస్టమ్స్ శాఖ రూ. 89 కోట్ల భారీ జరిమానా విధించడంతో నటి రన్యా రావు తీవ్ర ఇబ్బందుల్లో పడ్డారు. సినిమా రంగానికి చెందిన నటి ఈ స్థాయిలో స్మగ్లింగ్ నెట్‌వర్క్ నడపడం, రూ. 244 కోట్ల జరిమానా పడటం సినీ మరియు రాజకీయ వర్గాల్లో తీవ్ర కలకలం రేపుతోంది.
