నిర్మల్ జిల్లాలో సాగునీటి కోసం ఆందోళన చేపట్టిన రైతులకు ఊరట లభించింది. జన్నారం, దస్తురాబాద్ మండలాల్లోని చివరి ఆయకట్టు భూములకు సాగునీరు అందించాలన్న రైతుల డిమాండ్‌పై అధికారులు స్పందించారు. పంటలు ఎండిపోకుండా కాపాడేందుకు కడెం ప్రాజెక్టు నుంచి 700 క్యూసెక్కుల నీటిని విడుదల చేశారు. ఇటీవల సాగునీటి సమస్యతో ఇబ్బందులు ఎదుర్కొంటున్న ఈ రెండు మండలాల రైతులు తమ పొలాలకు నీరందించాలని కోరుతూ ఆందోళనలు చేపట్టారు. రైతుల విజ్ఞప్తులను పరిగణనలోకి తీసుకున్న అధికారులు నీటి విడుదలకు చర్యలు చేపట్టారు. దీంతో చివరి ఆయకట్టు రైతుల్లో ఆశలు చిగురించాయి.
కడెం ప్రాజెక్టు నుంచి నీటి విడుదలపై ఖానాపూర్ ఎమ్మెల్యే వెడ్మ బొజ్జు పటేల్ స్పందించారు. రైతుల సమస్యను జిల్లా ఇన్‌చార్జి మంత్రి జూపల్లి కృష్ణారావు, రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి దృష్టికి తీసుకెళ్లినట్లు వెల్లడించారు. మంత్రులతో చర్చించిన అనంతరం రైతుల అవసరాలను దృష్టిలో ఉంచుకుని 700 క్యూసెక్కుల నీటిని విడుదల చేయించినట్లు తెలిపారు. సాగునీటి విషయంలో రైతులు ఆందోళన చెందాల్సిన అవసరం లేదని, చివరి ఆయకట్టు వరకు నీరందించేలా చర్యలు తీసుకుంటామని భరోసా ఇచ్చారు. రైతుల సంక్షేమమే ప్రభుత్వ ప్రాధాన్యమని, పంటలకు నీటి కొరత లేకుండా కృషి చేస్తామని పేర్కొన్నారు. కడెం ప్రాజెక్టు నుంచి నీటి విడుదలతో జన్నారం, దస్తురాబాద్ మండలాల్లో సాగునీటి సమస్యకు తాత్కాలిక ఉపశమనం లభించనుంది.
