మహిళల క్రికెట్ (Women’s Cricket) ప్రపంచ కప్ (World Cup) 2025 టోర్నమెంట్ ప్రారంభానికి నెల రోజులు మాత్రమే ఉండగా, అంతర్జాతీయ క్రికెట్ కౌన్సిల్ (ICC) ఒక చారిత్రక నిర్ణయం తీసుకుంది. టోర్నమెంట్ ప్రైజ్ మనీ (Prize Money) ని ఏకంగా నాలుగు రెట్లు పెంచుతున్నట్టు ప్రకటించింది.
ఈసారి ఎనిమిది జట్ల టోర్నమెంట్‌లో మొత్తం ప్రైజ్ మనీ రూ. 115 కోట్లుగా ఉంది. ఇది 2022లో జరిగిన చివరి టోర్నమెంట్‌తో పోలిస్తే 297 శాతం ఎక్కువ. అంతేకాకుండా, ఇది పురుషుల క్రికెట్ ప్రపంచ కప్ ప్రైజ్ మనీని కూడా అధిగమించడం విశేషం.
ఈ అపూర్వమైన పెంపుదల ఫలితంగా, విజేతలకు రూ. 37 కోట్లు, రన్నరప్‌కు రూ. 18.5 కోట్లు లభిస్తాయి. సెమీ-ఫైనల్‌లో ఓడిపోయిన జట్లకు కూడా రూ. 9.2 కోట్ల చొప్పున ప్రైజ్ మనీ అందజేస్తారు.
ICC ఛైర్మన్ జై షా (Jay Shah) మాట్లాడుతూ, “ప్రైజ్ మనీని నాలుగు రెట్లు పెంచడం మహిళల క్రికెట్ దీర్ఘకాలిక వృద్ధికి మా నిబద్ధతను తెలియజేస్తుంది. పురుషులతో సమానంగా మహిళా క్రికెటర్లను చూస్తామని మా సందేశం స్పష్టం చేస్తుంది” అని అన్నారు. మహిళల క్రికెట్ ప్రగతిశీల పంథాలో పయనిస్తోందని, ఈ చర్యతో ఆ వేగం మరింత పెరుగుతుందని ఆయన ఆశాభావం వ్యక్తం చేశారు.
