భారత ఎన్నికల సంఘం (ECI) ఓటర్ల జాబితా సవరణ, నమోదు ప్రక్రియపై సంచలన నిర్ణయం తీసుకుంది. స్పెషల్ ఇంటెన్సివ్ రివిజన్ (SIR) ముగిసిన రాష్ట్రాల్లో ఏ ఒక్క అర్హుడైన పౌరుడు కూడా ఓటు హక్కు కోల్పోకూడదనే లక్ష్యంతో ప్రత్యేక ఓటర్ల నమోదు డ్రైవ్‌ను చేపట్టాలని అన్ని రాష్ట్రాల ముఖ్య ఎన్నికల అధికారులకు (CEOs) ఈసీఐ స్పష్టమైన ఆదేశాలు జారీ చేసింది.
ఈ నిర్ణయంతో కొత్త ఓటర్లు, పాత జాబితాల్లో పేర్లు గల్లంతైన పౌరులు తమ ఓటు హక్కును పొందేందుకు మార్గం సుగమమైంది. ఎన్నికల సంఘం జారీ చేసిన ఆదేశాల ప్రకారం అర్హులైన ప్రతి ఒక్కరినీ ఓటర్ల జాబితాలో చేర్చనున్నారు. బూత్ స్థాయి అధికారులు (BLOలు), క్షేత్రస్థాయి సిబ్బంది నేరుగా ప్రజల ఇళ్లకు వెళ్లి సమాచారాన్ని సేకరించాలి.
బిఎల్‌వోలు ప్రతి వారమూ కనీసం 20 నుండి 25 మంది నివాసితులను లేదా ఇళ్లను క్షుణ్ణంగా పరిశీలించి, వారి ఓటు నమోదు వివరాలను ధృవీకరించుకోవాలి. అర్హత ఉండి ఓటు లేని వారి నుంచి తక్షణమే ఫారమ్ – 6 (Form-6) దరఖాస్తులను పూరించి, స్వీకరించేలా బిఎల్‌వోలు చర్యలు తీసుకోవాలి.
ఈ ప్రత్యేక డ్రైవ్‌లో సమాజంలోని ప్రతి వర్గానికి ప్రాతినిధ్యం లభించేలా ఈసీ ప్రత్యేక శ్రద్ధ వహించింది. 18 సంవత్సరాలు నిండి తొలిసారిగా ఓటు హక్కు సాధించే యువతను ప్రత్యేకంగా గుర్తించి వారిని ఓటర్లుగా నమోదు చేయించాలి. గతంలో ఓటు హక్కు ఉండి, నూతన జాబితా లేదా SIR ముసాయిదాలో పేర్లు లభించని అర్హులైన పౌరుల వివరాలను సరిచేసి తిరిగి నమోదు చేయాలి.
స్థిరమైన నివాసం లేని నిరాశ్రయులు, వలస కార్మికులు, దినసరి కూలీలకు ఓటు హక్కు కల్పించేందుకు ప్రత్యేక నమోదు శిబిరాలను (Special Camps) నిర్వహించాలని ఈసీఐ ఆదేశించింది. సార్వత్రిక సమానత్వంతో అర్హులైన పౌరులందరికీ ఓటు హక్కు కల్పించడమే ధ్యేయంగా ఈసీ చేపట్టిన ఈ ప్రత్యేక డ్రైవ్, క్షేత్రస్థాయిలో ఓటర్ల జాబితాను మరింత పారదర్శకంగా మార్చనుందని అధికారులు వెల్లడించారు.
