బాలీవుడ్ స్టార్ హీరో రణవీర్ సింగ్ ప్రధాన పాత్రలో నటించిన యాక్షన్ స్పై థ్రిల్లర్ ‘ధురంధర్ 2 – ద రివెంజ్’ (Dhurandhar 2: The Revenge) బాక్సాఫీస్ వద్ద రికార్డులను తిరగరాస్తోంది. 2026 మార్చిలో విడుదలైన ఈ చిత్రం ప్రపంచవ్యాప్తంగా భారీ వసూళ్లను రాబట్టింది. థియేటర్లలో రచ్చ చేసిన ఈ మూవీ ఇప్పుడు డిజిటల్ ప్రీమియర్ ద్వారా అలరించేందుకు సిద్ధమైంది. అయితే, దీని OTT విడుదల విషయంలో ఒక ట్విస్ట్ ఉంది.
నెట్ఫ్లిక్స్ అధికారిక సమాచారం ప్రకారం, ‘ధురంధర్ 2’ అంతర్జాతీయంగా (భారత్ మినహా) మే 14, 2026 నుండి స్ట్రీమింగ్ కానుంది. కొన్ని దేశాల్లో టైమ్ జోన్ బట్టి మే 15న అందుబాటులోకి వస్తుంది. విశేషం ఏంటంటే, థియేట్రికల్ వెర్షన్ కంటే అదనపు ఫుటేజీతో 3 గంటల 52 నిమిషాల సుదీర్ఘ రన్టైమ్తో “రా & అన్దేఖా” (Raw & Undekha) ట్యాగ్లైన్తో ఇది విడుదల కాబోతోంది. ఇందులో అన్సెన్సార్డ్ డైలాగులు కూడా ఉండనున్నాయి.
భారతదేశంలో మాత్రం ఈ చిత్రం నెట్ఫ్లిక్స్లో రావడం లేదు. తాజా నివేదికల ప్రకారం, ఇండియాలో ‘ధురంధర్ 2’ డిజిటల్ హక్కులను జియో హాట్స్టార్ కైవసం చేసుకుంది. థియేటర్లలో విడుదలై 8 వారాలు పూర్తయిన తర్వాత, అంటే మే 14 నుండి జియో హాట్స్టార్లో స్ట్రీమింగ్ అయ్యే అవకాశం ఉందని సమాచారం.
ఈ సినిమా OTT విడుదలకు సంబంధించి ఇటీవల ఒక కోర్టు కేసు కూడా చర్చనీయాంశమైంది. ‘త్రిదేవ్’ సినిమాలోని సూపర్ హిట్ సాంగ్ ‘తిర్చి టోపివాలే’ని ఈ మూవీ క్లైమాక్స్లో ‘రంగ్ దే లాల్’ పేరుతో రీమిక్స్ చేశారు. దీనిపై త్రిదేవ్ దర్శకుడు రాజీవ్ రాయ్ అనుమతి లేకుండా పాటను వాడారంటూ న్యాయస్థానాన్ని ఆశ్రయించారు. ఈ విచారణ సమయంలోనే నిర్మాతలు సినిమా OTT విడుదల మే మధ్యలో ఉంటుందని కోర్టుకు తెలియజేశారు.
