రాష్ట్రంలో మహిళల రక్షణ ప్రశ్నార్థకంగా మారుతోంది. సాక్షాత్తూ ముఖ్యమంత్రి నారా చంద్రబాబు నాయుడు సొంత మండలం చంద్రగిరిలో ఒక మహిళపై అధికార పార్టీ కార్యకర్త నడిరోడ్డుపై విచక్షణా రహితంగా దాడికి తెగబడటం సంచలనం రేపుతోంది. పోలీసులు కళ్లముందే ఉన్నా, వారు ప్రేక్షక పాత్ర వహించడం పట్ల తీవ్ర విమర్శలు వ్యక్తమవుతున్నాయి.
ఘటన వివరాలు
చంద్రగిరి మండలం కొటాల గ్రామానికి చెందిన విశ్వేశ్వరి అనే మహిళకు, అదే గ్రామానికి చెందిన టీడీపీ కార్యకర్త నాగరాజు నాయుడుకు మధ్య గత కొంతకాలంగా భూ వివాదం నడుస్తోంది. సర్వే నెంబర్ 445/1A లోని 38 సెంట్ల స్థలం విషయంలో ఇరువర్గాల మధ్య ఘర్షణ నెలకొంది. ఈ భూమిపై కోర్టు స్టే (ఇంజెక్షన్ ఆర్డర్) ఉన్నప్పటికీ, దాన్ని ఏమాత్రం లెక్కచేయకుండా నాగరాజు నాయుడు దౌర్జన్యానికి దిగారు.
పోలీసుల ముందే దాడి
బాధితురాలు విశ్వేశ్వరి తన భూమిని కాపాడుకునే ప్రయత్నం చేయగా, నాగరాజు నాయుడు ఆమెపై విచక్షణా రహితంగా భౌతిక దాడికి దిగారు. అత్యంత దారుణమైన విషయం ఏమిటంటే.. అక్కడ ఇద్దరు కానిస్టేబుళ్లు ఉన్నప్పటికీ, వారు ఆ దాడిని అడ్డుకోకుండా చూస్తూ ఉండిపోయారు. దాడికి సంబంధించిన వీడియోలు సోషల్ మీడియాలో హల్చల్ చేస్తున్నాయి. అధికార పార్టీ నేతల ఒత్తిడి వల్లే పోలీసులు స్పందించలేదని బాధితురాలు ఆరోపిస్తున్నారు.
బాధితురాలి ఆవేదన
“టీడీపీ గ్రామ కమిటీ అధ్యక్షుడు రాజేంద్ర, హేమ కుమార్, వంశీ వంటి నాయకుల ఒత్తిడితోనే నాపై ఈ దాడి జరుగుతోంది. నా భూమిని కబ్జా చేసేందుకు ప్రయత్నిస్తున్నారు. దీనిపై ఇప్పటికే ముఖ్యమంత్రి చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రి లోకేష్లకు 12 సార్లు ఫిర్యాదు చేశాను. అయినా ఇప్పటివరకు నాకు న్యాయం జరగలేదు. పోలీసులు కూడా నన్ను రాజీ పడమని బెదిరిస్తున్నారు. ఇప్పుడు నాకు ప్రాణహాని ఉంది, దయచేసి నన్ను కాపాడండి” అంటూ విశ్వేశ్వరి కన్నీటిపర్యంతమయ్యారు.
కూటమి ప్రభుత్వంలో మహిళలకు రక్షణ ఏది?
రాష్ట్రంలో కూటమి ప్రభుత్వం అధికారంలోకి వచ్చిన తర్వాత మహిళలకు భద్రత కరువైందని ఈ ఘటన నిరూపిస్తోందని స్థానికులు, నెటిజన్లు మండిపడుతున్నారు. కోర్టు ఉత్తర్వులను సైతం ఖాతరు చేయకుండా అధికార మదంతో రెచ్చిపోతున్న నాగరాజు నాయుడుపై మరియు విధి నిర్వహణలో విఫలమైన పోలీసులపై కఠిన చర్యలు తీసుకోవాలని డిమాండ్ చేస్తున్నారు.
