లోకసభలో కేంద్రం కీలక బిల్లులు.. డీలిమిటేషన్‌పై విపక్షాల గందరగోళం

దేశ రాజకీయ ముఖచిత్రాన్ని మార్చే అత్యంత కీలకమైన మూడు బిల్లులను (Three Bills) కేంద్ర ప్రభుత్వం (Central Government) లోకసభలో (Lok Sabha) ప్రవేశపెట్టింది. నియోజకవర్గాల పునర్విభజన (డీలిమిటేషన్) (Delimitation) ప్రక్రియను వేగవంతం చేసే ఉద్దేశంతో ప్రవేశపెట్టిన ఈ బిల్లులపై విపక్షాలు తీవ్ర అభ్యంతరం వ్యక్తం చేస్తున్నాయి.

సభ ముందుకు మూడు కీలక బిల్లులు
కేంద్ర ప్రభుత్వం ఒకేసారి మూడు ప్రధాన బిల్లులను సభలో ప్రవేశపెట్టింది. 131వ రాజ్యాంగ సవరణ బిల్లును కేంద్ర న్యాయశాఖ మంత్రి అర్జున్ రామ్ మేఘ్వాల్ (Arjun Ram Meghwal) ప్రవేశపెట్టారు. డీలిమిటేషన్ కమిషన్ ఏర్పాటు బిల్లును కేంద్ర హోంమంత్రి అమిత్ షా (Amit Shah) సభ ముందు ఉంచారు. అదే విధంగా కేంద్ర పాలిత ప్రాంతాల్లో పునర్విభజన బిల్లును కేంద్రం స‌భ దృష్టికి తెచ్చింది.

ఓటింగ్, మెజారిటీ సమీకరణాలు
131వ రాజ్యాంగ సవరణ బిల్లును ప్రవేశపెట్టే ప్రక్రియలో సభలో ఓటింగ్ నిర్వహించారు. బిల్లు ప్రవేశపెట్టడానికి మద్దతుగా 207 ఓట్లు రాగా, వ్యతిరేకంగా 126 ఓట్లు వచ్చాయి. మొత్తం 333 మంది ఎంపీలు ఈ ఓటింగ్ ప్రక్రియలో పాల్గొన్నారు. అయితే, ఈ రాజ్యాంగ సవరణ బిల్లు (Constitutional Amendment Bill) తుది ఆమోదం పొందాలంటే సభలో 2/3 వంతు (రెండింట మూడొంతుల) మెజారిటీ తప్పనిసరి. ప్రస్తుతం లోకసభలో ఎన్డీఏ కూటమి (NDA Alliance) బలం 292 వద్ద ఉంది. ఈ బిల్లు నెగ్గాలంటే కేంద్రానికి ఇంకా 68 మంది సభ్యుల మద్దతు అవసరం కానుంది. ఇది ప్రభుత్వానికి సవాలుగా మారే అవకాశం ఉంది.

ఏకమైన విపక్షాలు.. హోరెత్తిన సభ
డీలిమిటేషన్ ప్రక్రియను ‘ఇండి’ (I.N.D.I.A) కూటమి గట్టిగా వ్యతిరేకిస్తోంది. ముఖ్యంగా కాంగ్రెస్, సమాజ్ వాదీ పార్టీ, టీఎంసీ, డీఎంకే, ఎంఐఎం, సీపీఎం, కేరళ రివల్యూషనరీ సోషలిస్టు పార్టీ వంటి పార్టీలు బిల్లుకు వ్యతిరేకంగా గళమెత్తాయి. దక్షిణాది రాష్ట్రాల ప్రాతినిధ్యం తగ్గిపోయే ప్రమాదం ఉందని, శాస్త్రీయమైన కుల గణన లేకుండా ఈ ప్రక్రియ చేపట్టడం సరికాదని విపక్ష నేతలు వాదించారు. ఈ బిల్లులపై సభలో సుదీర్ఘ చర్చ జరిగే అవకాశం ఉంది. మెజారిటీని కూడగట్టుకోవడంలో ప్రభుత్వం విజయం సాధిస్తుందా లేదా అన్నది ఇప్పుడు దేశవ్యాప్తంగా ఉత్కంఠ రేపుతోంది.