అన్నమయ్య జిల్లా (Annamayya District)లో రాజకీయ ఉద్రిక్తతలు హింసాకాండకు దారితీశాయి. రాయచోటి (Rayachoti) మార్కెట్ కమిటీ మాజీ వైస్ చైర్మన్, వైసీపీ బీసీ విభాగం (YSRCP BC Wing) రాష్ట్ర అధికార ప్రతినిధి సిబ్యాల విజయభాస్కర్ (Sibyala Vijayabhaskar)పై మంత్రి రాంప్రసాద్ రెడ్డి అనుచరులు దాడికి దిగారు. పట్టపగలు ఆయన ఇంటిపైకి దుండగులు దూసుకెళ్లి ఇనుప రాడ్లతో (Iron Rods) విచక్షణారహితంగా దాడి చేశారు.
మాజీ సీఎం జగన్పై మంత్రి రాంప్రసాద్ రెడ్డి చేసిన వ్యాఖ్యలపై విజయభాస్కర్ ఉదయం ఒక ప్రెస్ నోట్ విడుదల చేయడంతో ఈ దాడి జరిగినట్లు సమాచారం. దీనిపై ఆగ్రహించిన మంత్రి అనుచరులు సుమారు 20–30 మంది ఒక్కసారిగా ఆయన ఇంటిని లక్ష్యంగా చేసుకున్నారు. తెగబడి దాడి చేసిన ఘటనలో విజయభాస్కర్ తలకు, చేతికి తీవ్రమైన గాయాలు అయ్యాయి. రక్తగాయాలతో చిక్కుకున్న ఆయనను వెంటనే స్థానిక ఆసుపత్రికి తరలించారు. ప్రస్తుతం ఆయనకు వైద్యులు చికిత్స అందిస్తున్నారు.
దాడి ఘటనతో రాయచోటిలో ఉద్రిక్తత నెలకొంది. బాధితుడిని పరామర్శించేందుకు పలువురు నేతలు ఆసుపత్రికి తరలివచ్చారు. మునిసిపల్ చైర్మన్ ఫయాజ్ బాష (Fayaz Basha), మైనారిటీ విభాగం జిల్లా అధ్యక్షుడు మహమ్మద్ ఖాన్ (Mohammed Khan), పలువురు కౌన్సిలర్లు ఘటనను తీవ్రంగా ఖండించారు. రాజకీయ వైరం పేరుతో దాడులు జరగడం ప్రజాస్వామ్యానికి మచ్చ అంటూ స్పందించారు. నిందితులపై కఠిన చర్యలు తీసుకోవాల్సిందిగా డిమాండ్ చేశారు.
