కాశినాయన క్షేత్రం కూల్చివేతపై ఉమ్మడి చిత్తూరు జిల్లా వైసీపీ అధ్యక్షుడు భూమన కరుణాకర్ రెడ్డి తీవ్రస్థాయిలో మండిపడ్డారు. 24 గంటల పాటు అన్నదానం నిర్వహించే ఈ దివ్యక్షేత్రాన్ని కూటమి ప్రభుత్వం బుల్డోజర్‌తో నేలమట్టం చేసిందని ఆగ్రహం వ్యక్తం చేశారు. కోట్లాది హిందువుల మనోభావాలు దెబ్బతినేలా, హిందూ ధర్మాన్ని అవమానించేలా ప్రభుత్వం వ్యవహరించిందని విమర్శించారు.
తాను హిందూ ధర్మ పరిరక్షణకు కట్టుబడి ఉన్నానని చెప్పే సీఎం చంద్రబాబు హయాంలోనే కాశినాయన క్షేత్రం నేలకొరిగిందని భూమన ఆరోపించారు. తీవ్ర వ్యతిరేకత కారణంగా మంత్రి నారా లోకేష్ తానే ఆలయాన్ని తిరిగి నిర్మిస్తానని చెప్పాల్సి వచ్చిందని ఆయన గుర్తుచేశారు.
హిందూ ఆలయాలకు రక్షణ ఉందా?
“టైగర్ జోన్‌లో ఉంది” అనే కారణంతో కాశినాయన క్షేత్రాన్ని కూల్చివేశారని, అదే తాత్త్వికత పాటిస్తే శ్రీశైల మల్లన్న దేవాలయాన్ని కూడా తొలగించాలా? అని భూమన నిలదీశారు. కూటమి ప్రభుత్వంలో దేవాలయాలకు భద్రత లేదని, సనాతన ధర్మ పరిరక్షణ పూర్తిగా దెబ్బతిందని ఆయన ఆరోపించారు.
టీడీపీ, బీజేపీపై విమర్శలు
సీఎం చంద్రబాబు వైసీపీ హయాంలో నెయ్యిలో కల్తీ జరిగిందని నిర్భయంగా ప్రకటించారని, ఇది కేవలం రాజకీయ ఆరోపణ మాత్రమేనని భూమన పేర్కొన్నారు. తిరుమలలో మూడు సార్లు ఎర్ర చందనం పట్టుబడినా కూటమి ప్రభుత్వం అప్రతిష్టను తట్టుకుని నిలబడ్డదని విమర్శించారు. కాశినాయన క్షేత్రంపై దాడి జరిగినా బీజేపీ ఎందుకు నోరు మెదపడం లేదని ప్రశ్నించారు.
