ఆళ్లగడ్డ టీడీపీ ఎమ్మెల్యే భూమా అఖిల ప్రియ సోదరుడు భూమా జగత్‌ విఖ్యాత్ రెడ్డిపై ముఖ్యమంత్రి కార్యాలయంలో (సీఎంఓ) ఫిర్యాదు నమోదైంది.
మంత్రుల ఫిర్యాదు – విచారణ ప్రారంభం
నంద్యాల కలెక్టరేట్‌లో నిర్వహించిన అధికారిక సమీక్ష సమావేశానికి ఎమ్మెల్యే భూమా అఖిల ప్రియ స్థానంలో టీడీపీ నేత విఖ్యాత్ రెడ్డి హాజరయ్యారు. అయితే, అధికార హోదా లేకున్నా ఆయన ఈ సమావేశంలో పాల్గొనడంపై మంత్రులు బీసీ జనార్ధన్‌ రెడ్డి, మహమ్మద్ ఫరూఖ్ తీవ్ర అభ్యంతరం వ్యక్తం చేశారు. వెంటనే సీఎంఓకు ఫిర్యాదు చేస్తూ, దీనిపై విచారణ జరిపించాలని కోరారు.
ఈ నేపథ్యంలో ఇంటలిజెన్స్ అధికారులు ఈ ఘటనపై సమాచారం సేకరిస్తున్నారు. సమావేశంలో మంత్రులతో పాటు ఎమ్మెల్యేలు కోట్ల సూర్య ప్రకాష్ రెడ్డి, గౌరు చరిత, జిల్లా కలెక్టర్ రాజకుమారి, జడ్పీ చైర్మన్ ఎర్రబోతుల పాపిరెడ్డి తదితరులు పాల్గొన్నారు. మంత్రులు, ఎమ్మెల్యేలతో కలిసి భూమా విఖ్యాత్ రెడ్డి వేదికపై కూర్చొని అధికారులను ప్రశ్నించడం చర్చనీయాంశమైంది.
