మెగా పవర్‌స్టార్‌ రామ్‌చరణ్‌, క్రియేటివ్‌ డైరెక్టర్‌ సుకుమార్‌ కాంబినేషన్‌లో తెరకెక్కనున్న RC17 సినిమాపై ఇప్పటికే భారీ అంచనాలు నెలకొన్నాయి. ఈ ప్రాజెక్ట్‌ అధికారికంగా ప్రారంభం కాకముందే నటీనటులు, సంగీత దర్శకుడి ఎంపికపై పలు వార్తలు సోషల్‌ మీడియాలో వైరల్‌ అవుతున్నాయి. ఈ సినిమాకు దేవిశ్రీ ప్రసాద్‌ బదులుగా అనిరుధ్‌ రవిచందర్‌ సంగీతం అందించనున్నట్లు ప్రచారం జరుగుతుండగా, హీరోయిన్‌ ఎంపిక ఇప్పుడు ఆసక్తికరంగా మారింది. రామ్‌చరణ్‌కు జోడీగా బాలీవుడ్‌ హీరోయిన్‌ను తీసుకోవాలని చిత్రబృందం భావిస్తున్నట్లు వార్తలు వినిపిస్తున్నాయి. ఈ క్రమంలో గతంలో కియారా అద్వానీ, సారా అర్జున్‌ పేర్లు తెరపైకి రాగా, తాజాగా ‘సైయారా’ సినిమాతో గుర్తింపు తెచ్చుకున్న అనీత్‌ పడ్డా పేరు వినిపిస్తోంది.
బాలీవుడ్‌లో ‘సైయారా’ సినిమాతో ప్రేక్షకుల దృష్టిని ఆకర్షించిన అనీత్‌ పడ్డాకు ఈ చిత్రం మంచి గుర్తింపు తెచ్చిపెట్టింది. అంతకుముందు ‘సలామ్‌ వెంకీ’లో నటించినప్పటికీ, ‘సైయారా’ విజయంతో ఆమెకు మరింత ప్రజాదరణ లభించింది. ప్రస్తుతం ‘శక్తి శాలిని’ చిత్రంతో పాటు ఇతర ప్రాజెక్టులతో బిజీగా ఉన్న ఈ భామ పేరు ఇప్పుడు టాలీవుడ్‌లోనూ చర్చకు వస్తోంది. ఇటీవల ఆమె హైదరాబాద్‌లో కనిపించడంతో RC17లో హీరోయిన్‌గా నటించబోతున్నారనే ఊహాగానాలు మొదలయ్యాయి. అధికారిక ప్రకటన వచ్చే వరకు వేచి చూడాలి.
