టీమిండియా మాజీ కెప్టెన్ విరాట్ కోహ్లీ టెస్టు కెప్టెన్సీపై మాజీ సారథి రోహిత్ శర్మ ప్రశంసలు కురిపించాడు. భారత టెస్టు జట్టు కెప్టెన్గా కోహ్లీ తీసుకొచ్చిన మార్పులు, అతడి నాయకత్వంలో జట్టు సాధించిన విజయాలు, పోరాట స్ఫూర్తిని ప్రత్యేకంగా అభినందించాడు. 2014 నుంచి 2022 వరకు 68 టెస్టుల్లో భారత్కు సారథ్యం వహించిన కోహ్లీ.. 40 విజయాలు అందించి, భారత టెస్టు కెప్టెన్లలో అత్యధిక విజయాలు సాధించిన కెప్టెన్గా నిలిచాడు. ఎంఎస్ ధోనీ 60 టెస్టుల్లో 27 విజయాలు సాధించగా.. రోహిత్ 2022-24 మధ్య 24 టెస్టులకు నాయకత్వం వహించి 12 విజయాలు అందించాడు. కోహ్లీ కెప్టెన్సీలో భారత టెస్టు జట్టు సాధించిన విజయాలు, ముఖ్యంగా విదేశాల్లో జట్టు పోరాట పటిమ, తనను ఎంతగానో ఆకట్టుకున్నాయని రోహిత్ పేర్కొన్నాడు.
కోహ్లీతో తనకు చాలా కాలంగా మంచి అనుబంధం, పరస్పర గౌరవం కొనసాగుతున్నాయని రోహిత్ చెప్పాడు. ప్రస్తుతం ఇద్దరూ తరచూ కలుసుకోకపోయినా.. బ్యాటింగ్కు సంబంధించిన అంశాలపై ఒకరికొకరు సలహాలు ఇచ్చుకుంటూనే ఉంటామని వెల్లడించాడు. తన బ్యాటింగ్లో ఏదైనా మార్పు అవసరమని కోహ్లీ భావిస్తే చెబుతాడని, అలాగే కోహ్లీ ఆటలో తాను గమనించిన విషయాలను అతడితో పంచుకుంటానని రోహిత్ తెలిపాడు. గతంలో ప్రతి 5–7 రోజులకు ఒకసారి కలుసుకునేవాళ్లమని, ఇప్పుడు ఇద్దరూ ఇంట్లో ఎక్కువ సమయం గడుపుతున్నప్పటికీ భౌగోళిక దూరం కారణంగా కలుసుకోవడం తగ్గిందని సరదాగా చెప్పాడు. మొత్తంగా కోహ్లీ, రోహిత్ మధ్య ఉన్న పోటీ కంటే పరస్పర గౌరవం, క్రికెట్పై ఒకరికొకరు ఇచ్చుకునే సలహాలు మరోసారి స్పష్టమయ్యాయి.
