ఆసియా క్రీడలు 2026 క్రికెట్ పోటీల్లో భాగంగా ఆఫ్ఘనిస్తాన్పై నేపాల్ సంచలన విజయం సాధించింది. నాలుగో లీగ్ మ్యాచ్లో నేపాల్ 5 వికెట్ల తేడాతో ఆఫ్ఘనిస్తాన్ను ఓడించింది. టాస్ గెలిచి తొలుత బ్యాటింగ్ చేసిన ఆఫ్ఘనిస్తాన్ 20 ఓవర్లలో 7 వికెట్ల నష్టానికి 102 పరుగులకే పరిమితమైంది. ఫైసల్ షినోజాదా, నజీబుల్లా జాద్రాన్ చెరో 30 పరుగులు చేయగా, మిగతా బ్యాటర్లు పెద్దగా రాణించలేదు. నేపాల్ బౌలర్లలో కుశాల్ భుర్తేల్ 4 వికెట్లు, లలిత్ రాజ్బన్షి 3 వికెట్లు పడగొట్టారు. అనంతరం 103 పరుగుల స్వల్ప లక్ష్యంతో బరిలోకి దిగిన నేపాల్ 17.2 ఓవర్లలో 5 వికెట్లు కోల్పోయి విజయాన్ని అందుకుంది. సందీప్ జోరా 34, రోహిత్ పౌడెల్ 33 పరుగులతో రాణించగా, కెప్టెన్ దీపేంద్ర సింగ్ ఐరీ 15 పరుగులు చేశాడు.
ఆఫ్ఘనిస్తాన్కు ఓటమి ఎదురైనా, గ్రూప్ దశలో జపాన్పై సాధించిన భారీ విజయం కారణంగా మెరుగైన నెట్ రన్రేట్తో క్వార్టర్ ఫైనల్కు చేరుకునే అవకాశం దక్కింది. గ్రూప్-ఎలో నేపాల్, జపాన్ మధ్య మరో మ్యాచ్ జరగాల్సి ఉంది. ఆ మ్యాచ్లో నేపాల్ విజయం సాధిస్తే గ్రూప్లో అగ్రస్థానానికి చేరుకునే అవకాశం ఉంది. మరోవైపు ఆఫ్ఘనిస్తాన్ కనీసం రెండో స్థానంలో నిలిచి క్వార్టర్ ఫైనల్కు అర్హత సాధించనుంది. రెండో స్థానంలో నిలిస్తే తదుపరి దశలో బలమైన భారత్తో తలపడే అవకాశం ఉండటంతో ఆసియా క్రీడల క్రికెట్ పోటీలు మరింత ఆసక్తికరంగా మారాయి.
