భారత క్రికెట్లో(Indian Cricket) సెప్టెంబర్లో కీలక మార్పులు చోటుచేసుకునే అవకాశం ఉందనే వార్తలు వస్తున్నాయి. బీసీసీఐ (BCCI) సెంటర్ ఆఫ్ ఎక్సలెన్స్ (CoE) అధిపతి, మాజీ క్రికెటర్ వీవీఎస్ లక్ష్మణ్కు(VVS Laxman) మరింత విస్తృతమైన బాధ్యతలు అప్పగించే అంశంపై బోర్డు చర్చిస్తున్నట్లు సమాచారం. ఆయనను ‘క్రికెట్ డైరెక్టర్’గా(Cricket Director) నియమించే అవకాశం ఉందనే ప్రచారం జరుగుతోంది. అయితే దీనిపై బీసీసీఐ నుంచి ఇప్పటివరకు ఎలాంటి అధికారిక ప్రకటన వెలువడలేదు. లక్ష్మణ్కు ఈ బాధ్యతలు దక్కితే టీమ్ఇండియా, సెలక్షన్ కమిటీ, కోచింగ్ సిబ్బంది, CoE, ఆటగాళ్ల మధ్య సమన్వయం చేయడంతో పాటు ప్లేయర్ డెవలప్మెంట్(Player Development), ప్రతిభను గుర్తించడం(Talent Identification), ఫిట్నెస్(Fitness), అత్యుత్తమ ప్రదర్శన కార్యక్రమాలు, భారత క్రికెట్ దీర్ఘకాలిక ప్రణాళికల్లో కీలక పాత్ర పోషించే అవకాశం ఉంది. ఇదే సమయంలో చీఫ్ సెలెక్టర్ అజిత్ అగార్కర్ పదవీకాలం, సెలక్షన్ కమిటీ భవిష్యత్తుపైనా సెప్టెంబర్లో నిర్ణయాలు తీసుకునే అవకాశం ఉందని తెలుస్తోంది.
భారత క్రికెట్ వ్యవస్థతో లక్ష్మణ్కు సుదీర్ఘ అనుబంధం ఉంది. CoE ద్వారా యువ, సీనియర్ ఆటగాళ్ల ఫిట్నెస్, రిహాబిలిటేషన్(Rehabilitation), అత్యుత్తమ ప్రదర్శన కార్యక్రమాలను ఆయన పర్యవేక్షిస్తున్నారు. అవసరమైన సందర్భాల్లో టీమ్ఇండియాకు తాత్కాలిక కోచ్గా కూడా వ్యవహరించారు. 2024లో రాహుల్ ద్రవిడ్ తర్వాత హెడ్ కోచ్ పదవికి ఆయన పేరు పరిశీలనలో ఉన్నప్పటికీ CoEలోనే కొనసాగారు. ఇప్పుడు క్రికెట్ డైరెక్టర్ పదవి ఏర్పాటు చేస్తే.. ప్రస్తుతం ఆయన నిర్వహిస్తున్న బాధ్యతలకు మరింత విస్తృత రూపంగా మారే అవకాశం ఉంది. అయితే పదవి ఏర్పాటు, లక్ష్మణ్ నియామకం, ఆయనకు అప్పగించే బాధ్యతలపై తుది నిర్ణయం తీసుకోవాల్సి ఉంది. అధికారిక ప్రకటన వచ్చే వరకు లక్ష్మణ్కు క్రికెట్ డైరెక్టర్ పదవి అనే వార్తలను ప్రతిపాదనలు, నివేదికలుగానే చూడాల్సి ఉంటుంది.
