‘లెనిన్’ సినిమాతో టాలీవుడ్లో తొలి బ్లాక్బస్టర్ విజయాన్ని ఖాతాలో వేసుకున్న యువ నటి భాగ్యశ్రీ బోర్సే ప్రస్తుతం ఫుల్ జోష్లో ఉంది. ఈ చిత్రంలో తన నటనతో ప్రేక్షకులను ఆకట్టుకున్న ఆమెకు వరుస అవకాశాలు కూడా క్యూ కడుతున్నాయి. తాజాగా ఓ ఇంటర్వ్యూలో పాల్గొన్న భాగ్యశ్రీకి సినీ పరిశ్రమలో ఏ సెలబ్రిటీతో డిన్నర్ చేయాలని కోరుకుంటారని ప్రశ్నించగా, ఏమాత్రం ఆలోచించకుండా స్టార్ హీరోయిన్ అనుష్క శెట్టి పేరును చెప్పింది. అనుష్క తనకు కేవలం ఇష్టమైన నటి మాత్రమే కాదని, గొప్ప వ్యక్తిత్వం కలిగిన అద్భుతమైన మహిళ అని ప్రశంసించింది. ఇండస్ట్రీలోకి వచ్చినప్పటి నుంచి అనుష్క ప్రయాణాన్ని ఎంతో ఆసక్తిగా గమనిస్తున్నానని, నటిగా మాత్రమే కాకుండా వ్యక్తిగా కూడా ఆమెపై తనకు అపారమైన గౌరవం ఉందని వెల్లడించింది.
అవకాశం వస్తే అనుష్కను వ్యక్తిగతంగా కలిసి ప్రశాంతంగా కూర్చొని మాట్లాడాలని, ఆమె అనుభవాలు, జీవిత ప్రయాణం గురించి తెలుసుకోవాలని ఎంతో ఆసక్తిగా ఎదురుచూస్తున్నానని భాగ్యశ్రీ చెప్పింది. ఆమె చేసిన ఈ వ్యాఖ్యలు ప్రస్తుతం సోషల్ మీడియాలో వైరల్గా మారగా, అనుష్క అభిమానులు ఆనందం వ్యక్తం చేస్తున్నారు. సింప్లిసిటీ, వినయం, అద్భుతమైన నటనతో తెలుగు సినీ పరిశ్రమలో ప్రత్యేక గుర్తింపు సంపాదించుకున్న అనుష్కకు కొత్త తరం నటీనటుల్లోనూ విశేష అభిమానులు ఉన్నారనే విషయాన్ని భాగ్యశ్రీ వ్యాఖ్యలు మరోసారి స్పష్టం చేశాయి. ఇక ‘లెనిన్’ విజయంతో కెరీర్లో కీలక మలుపు తిరిగిన భాగ్యశ్రీ బోర్సే, రాబోయే రోజుల్లో మరిన్ని ఆసక్తికరమైన పాత్రలతో ప్రేక్షకులను అలరించేందుకు సిద్ధమవుతోంది.
ముదురుతున్న వివాదం.. బోండా ఉమ వర్సెస్ టీడీపీ!