సచిన్.. ధోనీ.. కోహ్లీ తర్వాత ఇప్పుడు వైభవ్ యుగమా?

భారతదేశంలో(India) క్రికెట్ (Cricket) కేవలం ఆట కాదు.. అది కోట్లాది మంది భావోద్వేగాలతో ముడిపడిన ఒక మతం. ఈ భావోద్వేగాలకు గత మూడు దశాబ్దాలుగా రూపం ఇచ్చిన మహానుభావులు సచిన్ టెండూల్కర్(Sachin Tendulkar), మహేంద్ర సింగ్ ధోనీ(Mahendra Singh Dhoni), విరాట్ కోహ్లీ(Virat Kohli). ఇప్పుడు అదే జాబితాలో వేగంగా వినిపిస్తున్న కొత్త పేరు వైభవ్ సూర్యవంశీ(Vaibhav Suryavanshi). కేవలం 15 ఏళ్ల వయసులోనే ప్రపంచ క్రికెట్‌ను తన వైపు తిప్పుకున్న ఈ టీనేజ్ సంచలనం, ఐపీఎల్ 2026(IPL 2026) ఎలిమినేటర్‌లో సన్‌రైజర్స్ హైదరాబాద్‌పై(SRH) ఆడిన విధ్వంసక ఇన్నింగ్స్‌తో భారత క్రికెట్ భవిష్యత్తుపై భారీ అంచనాలు పెంచేశాడు. కేవలం 29 బంతుల్లో 97 పరుగులు బాదిన వైభవ్.. ప్రపంచ స్థాయి బౌలర్లను భయపడకుండా చితక్కొట్టిన తీరు అభిమానులను ఆశ్చర్యానికి గురిచేసింది. అతడి బ్యాటింగ్‌లో కనిపించిన ఆత్మవిశ్వాసం, దూకుడు, టైమింగ్ ఇప్పుడు సోషల్ మీడియాలో హాట్ టాపిక్‌గా మారాయి.

1990లలో సచిన్ టెండూల్కర్ భారతీయులకు కలలు కనడం నేర్పించాడు. చిన్న పట్టణం నుంచి వచ్చిన ధోనీ ఒత్తిడిని జయించడం అంటే ఏమిటో చూపించాడు. తరువాత విరాట్ కోహ్లీ తన దూకుడుతో భారత క్రికెట్‌కు కొత్త దిశ ఇచ్చాడు. ఇప్పుడు అదే స్థాయిలో అభిమానుల్లో క్రేజ్ సంపాదిస్తున్నాడు వైభవ్ సూర్యవంశీ. అతడి ఆటలో సచిన్ క్లాస్ (Sachin Class), ధోనీ ధైర్యం (Dhoni Courage), కోహ్లీ అగ్రెషన్ (Kohli Aggression) మేళవింపుగా కనిపిస్తున్నాయని క్రికెట్ విశ్లేషకులు అభిప్రాయపడుతున్నారు. చిన్న వయసులోనే రికార్డులను బద్దలు కొడుతూ ముందుకు సాగుతున్న వైభవ్.. రాబోయే రోజుల్లో భారత క్రికెట్‌కు కొత్త సూపర్ స్టార్‌గా మారడం ఖాయమనే అభిప్రాయం అభిమానుల్లో బలపడుతోంది.