తెలుగు సినీ పరిశ్రమలో వందలాది చిత్రాల్లో నటించి మెప్పించిన సీనియర్ క్యారెక్టర్ ఆర్టిస్ట్ పావలా శ్యామల (Pavala Shyamala) పరిస్థితి అత్యంత విషమంగా మారింది. తీవ్రమైన గుండె సంబంధిత వ్యాధితో (Heart-related Disease) బాధపడుతున్న ఆమెకు ఎదురైన అనుభవం కార్పొరేట్ ఆసుపత్రుల అమానుషత్వానికి, సమాజంలో మానవత్వం మంటగలిసిపోతున్న తీరుకు అద్దం పడుతోంది.
డబ్బుల్లేవని చేర్చుకోని ఆసుపత్రి
తీవ్ర అనారోగ్యంతో బాధపడుతున్న పావలా శ్యామల శుక్రవారం రాత్రి చికిత్స నిమిత్తం హైదరాబాద్ (Hyderabad) కూకట్పల్లిలోని (Kukatpally) ఒక ప్రముఖ ప్రైవేట్ ఆసుపత్రికి (Private Hospital) వెళ్లారు. అయితే, అత్యవసర స్థితిలో ఉన్న ఆమెను కాపాడాల్సింది పోయి.. ఆసుపత్రిలో చేరడానికి, చికిత్సకు సరిపడా డబ్బులు ఆమె వద్ద లేవనే కారణంతో ఆసుపత్రి యాజమాన్యం చేర్చుకునేందుకు నిరాకరించింది. అంతటితో ఆగకుండా, ఆమెను అక్కడి నుంచి పంపించేందుకు ఒక క్యాబ్ (Cab) బుక్ చేసి బలవంతంగా వెనక్కి పంపించేసింది.
అర్ధరాత్రి జంక్షన్ వద్ద వదిలేసిన డ్రైవర్
ఆసుపత్రి యాజమాన్యం చూపిన అమానుషత్వం చాలదన్నట్టు.. సదరు క్యాబ్ డ్రైవర్ (Cab Driver) కూడా అంతే క్రూరంగా ప్రవర్తించాడు. అర్ధరాత్రి సమయంలో ఎటు వెళ్లాలో తెలియని అయోమయ స్థితిలో ఉన్న పావలా శ్యామలను కూకట్పల్లి వై జంక్షన్ (Y Junction) వద్ద రోడ్డు పక్కన ఉన్న ఫుట్పాత్పై (Footpath) వదిలేసి అక్కడి నుంచి వెళ్ళిపోయాడు. గుండె నొప్పితో బాధపడుతూ, దిక్కుతోచని స్థితిలో నడిరోడ్డుపై దీనంగా పడి ఉన్న ఆమెను చూసి స్థానికులు చలించిపోయారు.
‘ఆర్కే ఫౌండేషన్’కు తరలింపు
అర్ధరాత్రి వేళ ఫుట్పాత్పై అపస్మారక స్థితిలో ఉన్న ఆమెను గమనించిన స్థానికులు వెంటనే పోలీసులకు సమాచారం అందించారు. స్పందించిన పోలీసులు హుటాహుటిన సంఘటనా స్థలానికి చేరుకున్నారు. ఫుట్పాత్పై ఉన్నది నటి పావలా శ్యామలగా గుర్తించి, ఆమెకు ప్రాథమిక సాయం అందించారు. అనంతరం ఆమెను సురక్షితంగా కూకట్పల్లి పరిధిలోని ‘ఆర్కే ఫౌండేషన్’ (RK Foundation) స్వచ్ఛంద సంస్థకు తరలించారు. చిత్ర పరిశ్రమ పెద్దలు స్పందించి ఆమెకు శాశ్వత ప్రాతిపదికన వైద్య సహాయం అందించాలని కోరుతున్నారు.
పవన్ కళ్యాణ్ మీకిది తగునా..? విశ్లేషకుల సూటి ప్రశ్నలు