ఆంధ్రప్రదేశ్ న్యాయవ్యవస్థలో ఒక కొత్త అధ్యాయం మొదలైంది. ఏపీ హైకోర్టు ప్రధాన న్యాయమూర్తిగా (Chief Justice) జస్టిస్ లీసా గిల్ నియమితులయ్యారు. హైకోర్టు ఆవిర్భావం తర్వాత ఒక మహిళా న్యాయమూర్తి ఈ అత్యున్నత పదవిని అధిష్టించడం ఇదే తొలిసారి. కేంద్ర న్యాయ మంత్రిత్వ శాఖ దీనిపై అధికారిక నోటిఫికేషన్ విడుదల చేసింది.
ప్రస్తుత ప్రధాన న్యాయమూర్తి జస్టిస్ ధీరజ్ సింగ్ ఠాకూర్ నేడు (ఏప్రిల్ 24) పదవీ విరమణ చేయనున్నారు. ఈ నేపథ్యంలో, ఏప్రిల్ 25న జస్టిస్ లీసా గిల్ ఏపీ హైకోర్టు నూతన సీజేగా ప్రమాణ స్వీకారం చేయనున్నారు. సుప్రీంకోర్టు కొలీజియం ఈ ఏడాది ఫిబ్రవరి 26నే ఆమె పేరును ప్రతిపాదించింది.
జస్టిస్ లీసా గిల్ మాజీ న్యాయమూర్తి హర్ఫూల్ సింగ్ బ్రార్ కుమార్తె. పంజాబ్ విశ్వవిద్యాలయం నుండి బీఏ ఎల్ఎల్బీ, ఎల్ఎల్ఎం పూర్తి చేశారు. 1990లో న్యాయవాదిగా ప్రాక్టీస్ ప్రారంభించి, దాదాపు 36 ఏళ్ల సుదీర్ఘ అనుభవం గడించారు. సివిల్, క్రిమినల్, రాజ్యాంగ, సర్వీస్ మరియు రెవెన్యూ కేసులలో ఈమెకు విశేష ప్రావీణ్యం ఉంది. మార్చి 2014లో పంజాబ్-హర్యానా హైకోర్టులో జడ్జిగా బాధ్యతలు చేపట్టి, గత నెలలోనే ఏపీ హైకోర్టుకు బదిలీ అయ్యారు.
జస్టిస్ లీసా గిల్ నియామకంపై రాష్ట్ర ముఖ్యమంత్రి చంద్రబాబు, మాజీ ముఖ్యమంత్రి వైఎస్ జగన్మోహన్రెడ్డి హర్షం వ్యక్తం చేశారు. జస్టిస్ లీసా గిల్ నియామకం రాష్ట్రానికి గర్వకారణమని పేర్కొంటూ ఆమెకు శుభాకాంక్షలు తెలిపారు. ఏపీ హైకోర్టు చరిత్రలో ఇప్పటివరకు పురుషులే ప్రధాన న్యాయమూర్తులుగా ఉండగా తొలిసారి జస్టిస్ లీసా గిల్ నియమితులయ్యారు. ఈ నియామకం ద్వారా న్యాయ పరిపాలనలో కొత్త మార్పులు వస్తాయని న్యాయ నిపుణులు భావిస్తున్నారు.
