దేశ అత్యున్నత న్యాయవ్యవస్థలో పెను సంచలనం నమోదైంది. గత కొంతకాలంగా తీవ్రమైన అవినీతి అభియోగాలు ఎదుర్కొంటున్న జస్టిస్ యశ్వంత్ వర్మ తన పదవికి రాజీనామా చేశారు. ఆయనపై సుప్రీంకోర్టు అభిశంసన ప్రక్రియకు సిఫారసు చేసిన నేపథ్యంలో, పార్లమెంటులో తీర్మానం రాకముందే ఆయన తన రాజీనామా లేఖను భారత రాష్ట్రపతికి పంపారు.
నోట్ల కట్టల కలకలం – అసలు వివాదం ఇదే!
జస్టిస్ యశ్వంత్ వర్మ ఢిల్లీ హైకోర్టు న్యాయమూర్తిగా పనిచేస్తున్న సమయంలో ఆయన నివాసంలో జరిగిన ఒక అగ్నిప్రమాదం ఈ వివాదానికి కేంద్రబిందువుగా మారింది. ఆ సమయంలో మంటలను ఆర్పే క్రమంలో ఆయన ఇంట్లో భారీగా నోట్ల కట్టలు బయటపడ్డాయి. లెక్కల్లో చూపని ఇంత పెద్ద మొత్తంలో నగదు న్యాయమూర్తి నివాసంలో ఉండటంపై దేశవ్యాప్తంగా చర్చ మొదలైంది. ఈ పరిణామాల నేపథ్యంలో సుప్రీంకోర్టు కొలీజియం ఆయన్ని ఢిల్లీ హైకోర్టు నుంచి అలహాబాద్ హైకోర్టుకు బదిలీ చేసింది.
అభిశంసన ప్రక్రియ సాగుతుండగానే..
యశ్వంత్ వర్మపై వచ్చిన అభియోగాలు తీవ్రమైనవి కావడంతో సుప్రీంకోర్టు విచారణ చేపట్టింది. ప్రాథమిక ఆధారాలను పరిశీలించిన అనంతరం, ఆయనపై అభిశంసన (Impeachment) తీర్మానాన్ని ప్రవేశపెట్టాలని సుప్రీంకోర్టు సిఫారసు చేసింది. న్యాయమూర్తుల విచారణ చట్టం ప్రకారం ప్రక్రియ ప్రారంభమైన తరుణంలోనే, ఆయన పదవి నుంచి తప్పుకోవడం ప్రాధాన్యత సంతరించుకుంది.
ఒక సిట్టింగ్ జడ్జిపై అవినీతి ఆరోపణలు రావడం, అది అభిశంసన వరకు వెళ్లడం న్యాయవ్యవస్థలో అరుదుగా జరిగే పరిణామం. యశ్వంత్ వర్మ రాజీనామాతో ఈ వివాదం ఏ మలుపు తిరుగుతుందోనన్న ఉత్కంఠ నెలకొంది. ఈ రాజీనామాను రాష్ట్రపతి ఆమోదించాల్సి ఉంది.
