భారత్‌పై పాకిస్తాన్ మాజీ క్రికెట‌ర్‌ ప్రశంసలు

భారత క్రికెట్ జట్టు మరోసారి ప్రపంచ వేదికపై తన ఆధిపత్యాన్ని చాటుకుంది. నరేంద్ర మోడీ స్టేడియంలో జరిగిన ఉత్కంఠభరిత ఫైనల్ పోరులో భారత్ 96 పరుగుల భారీ తేడాతో న్యూజిలాండ్‌ను ఓడించి మూడోసారి టీ20 ప్రపంచ కప్‌ను కైవసం చేసుకుంది. ఈ అద్భుత విజయంపై ప్రపంచవ్యాప్తంగా ప్రశంసలు వెల్లువెత్తుతున్నాయి. ఆశ్చర్యకరంగా పాకిస్థాన్ మాజీ వేగ బౌలర్ షోయబ్ అక్తర్ కూడా భారత జట్టును ప్రశంసిస్తూ ఆసక్తికర వ్యాఖ్యలు చేశారు.

అక్తర్ మాట్లాడుతూ భారత జట్టు ఈ స్థాయికి చేరుకోవడం వెనుక కేవలం ఆటగాళ్ల ప్రతిభ మాత్రమే కాకుండా బలమైన ప్రణాళికలు, క్రమబద్ధమైన వ్యవస్థ కూడా కారణమని అన్నారు. ప్రతిభకు ప్రాధాన్యం ఇస్తూ జట్టును నిర్మించే విధానం భారత్ విజయాలకు మూలమని ఆయన అభిప్రాయపడ్డారు.

గంభీర్ ఎంపికలపై ప్రత్యేక ప్రశంసలు
టీమిండియా ప్రధాన కోచ్ గౌతమ్ గంభీర్ జట్టు ఎంపికలో చూపిన ధైర్యం, దూరదృష్టిని అక్తర్ ప్రత్యేకంగా కొనియాడారు. కేవలం గణాంకాలను మాత్రమే ఆధారంగా చేసుకోకుండా ఆటగాళ్లలోని అసలైన ప్రతిభను గుర్తించి వారికి అవకాశాలు ఇవ్వడం గొప్ప విషయం అని పేర్కొన్నారు. ప్రతిభావంతుడైన సంజూ శాంసన్ వంటి ఆటగాళ్లకు అవకాశం కల్పించడంలో గంభీర్ కీలక పాత్ర పోషించారని తెలిపారు.

అలాగే రోహిత్ శర్మ, విరాట్ కోహ్లీ వంటి దిగ్గజ ఆటగాళ్లకు భారత్ ఇచ్చిన గౌరవప్రదమైన వీడ్కోలు ఎంతో అద్భుతమని అక్తర్ అభిప్రాయపడ్డారు. సీనియర్ ఆటగాళ్ల నుంచి యువతకు బాధ్యతలు అప్పగించే విధానంలో భారత జట్టు చూపిన పరిపక్వతను ఇతర దేశాలు కూడా నేర్చుకోవాలని సూచించారు.

ఐక్యతే భారత విజయానికి బలం
భారత జట్టులో కనిపిస్తున్న ఐక్యత తనను ఎంతో ఆకట్టుకుందని అక్తర్ తెలిపారు. మాజీ ఆటగాళ్లు, ప్రస్తుత క్రికెటర్లు, కోచింగ్ సిబ్బంది అందరూ కలిసికట్టుగా విజయాన్ని ఆనందంగా జరుపుకోవడం వారి క్రమశిక్షణకు నిదర్శనమని చెప్పారు. పాకిస్థాన్ క్రికెట్ వ్యవస్థలో లోపిస్తున్న క్రమశిక్షణ, ఐక్యత, సరైన ప్రణాళికలు భారత క్రికెట్‌లో స్పష్టంగా కనిపిస్తున్నాయని, అందుకే భారత్ ఈ రోజు ప్రపంచ విజేతగా నిలిచిందని అక్తర్ స్పష్టం చేశారు.