భారతీయ సంగీత రంగంలో అపార కీర్తి పొందిన దిగ్గజ సంగీత దర్శకుడు ఇళయరాజా (Ilaiyaraaja)కు సుప్రీంకోర్టు (Supreme Court)లో నిరాశ ఎదురైంది. ఆయనకు చెందిన 500కు పైగా పాటల కాపీరైట్ (Copyright) వివాదాన్ని బాంబే హైకోర్టు నుంచి మద్రాస్ హైకోర్టుకు బదిలీ చేయాలని ఆయన దాఖలు చేసిన పిటిషన్ను సుప్రీంకోర్టు తిరస్కరించింది.
ఈ కేసును ప్రధాన న్యాయమూర్తి జస్టిస్ (Justice) బి.ఆర్. గవాయ్తో (B.R. Gavai) పాటు జస్టిస్ వినోద్ చంద్రన్ (Justice Vinod Chandran), జస్టిస్ ఎన్.వి. అంజరియా (Justice N.V. Anjaria)లతో కూడిన ధర్మాసనం విచారించింది. విచారణ అనంతరం, పిటిషన్లో ఇళయరాజా ప్రస్తావించిన కారణాలు సరిపోవని తేల్చి, ఆయన అభ్యర్థనను తోసిపుచ్చింది.
ఇళయరాజా పేరుతో బాణీలు వెలువడిన అనేక సినిమాల మ్యూజిక్ హక్కులపై గత కొన్ని సంవత్సరాలుగా వివాదాలు కొనసాగుతూనే ఉన్నాయి. తాజాగా, ఆయన ఈ వివాదాన్ని తన సొంత రాష్ట్రమైన తమిళనాడులో పరిష్కరించుకోవాలని భావించి, మద్రాస్ హైకోర్టుకు కేసును బదిలీ చేయాలంటూ కోర్టును ఆశ్రయించారు. అయితే, సుప్రీంకోర్టు ఈ అభ్యర్థనను అంగీకరించకపోవడంతో, ఈ నిర్ణయం ఇళయరాజా అభిమానుల్లో నిరాశను కలిగించింది. ఆయన తుది న్యాయపోరాటం బాంబే హైకోర్టులోనే ఎలా మలుపు తీసుకుంటుందో వేచి చూడాలి.
