సుప్రీం కోర్టు మాజీ ప్రధాన న్యాయమూర్తి ఎన్వీ రమణ స్థాపించిన సంస్థపై కోర్టు సంచలన తీర్పు వెలువ‌రించింది. అంతర్జాతీయ ఆర్బిట్రేషన్ అండ్‌ మీడియేషన్ సెంటర్ (ఐఏఎంసీ)కు 3.5 ఎకరాల భూమి కేటాయింపును రద్దు చేస్తూ హైకోర్టు సంచలన తీర్పు వెల్ల‌డిచింది. ఈ సంస్థను మాజీ ప్రధాన న్యాయమూర్తి ఎన్వీ రమణ స్థాపించారు. కాగా, హైదరాబాద్‌లోని రాయదుర్గం ప్రాంతంలో ఐఏఎంసీ కార్యాల‌యానికి కేటాయించిన భూమిని రద్దు చేస్తూ తెలంగాణ హైకోర్టు శుక్ర‌వారం తీర్పు వెలువ‌రించింది.
జస్టిస్ కె. లక్ష్మణ్, జస్టిస్ కె. సుజన ఆధ్వర్యంలోని డివిజన్ బెంచ్, న్యాయవాదులు కోటి రఘునాథ రావు, వెంకట్రామి రెడ్డి దాఖలు చేసిన రెండు పబ్లిక్ ఇంటరెస్ట్ లిటిగేషన్ (పీఐఎల్)లపై వాదనలను విన్న తర్వాత, చట్టపరమైన ప్రక్రియల ఉల్లంఘన, సుప్రీం కోర్టు మార్గదర్శకాలను అతిక్రమించినందుకు ఈ కేటాయింపును రద్దు చేస్తున్న‌ట్లుగా ప్ర‌క‌టించింది.
ఐఏఎంసీకి కేటాయించిన భూమి, శేరిలింగంపల్లి మండలంలోని సర్వే నెంబర్ 83/1లో ఉంది. ఇది హైదరాబాద్ ఐటీ కారిడార్‌లోని ఒక ప్రముఖ ప్రాంతం. దీని విలువ రూ. 350 కోట్లకు పైగా ఉంది. ఈ భూమిని గత బీఆర్ఎస్ ప్రభుత్వం, అప్పటి ముఖ్యమంత్రి కేసీఆర్ ఆదేశాల మేరకు, నామమాత్రపు ధరకు ఐఏఎంసీకి కేటాయించింది. అదనంగా, ఈ సెంటర్ నిర్మాణం కోసం రూ. 50 కోట్ల గ్రాంట్ కూడా ఇచ్చారు. 2022 మార్చి 11న అప్పటి సీజేఐ ఎన్వీ రమణ ఈ సెంటర్ శాశ్వత భవనానికి శంకుస్థాపన చేశారు. దీనిని భారతదేశంలో వివాద పరిష్కార విధానాలను ఆధునీకరించే దిశగా ఒక ముందడుగుగా ప్రశంసించారు.
అతికొద్ది కాలంలోనే ఈ కేటాయింపు వివాదాస్పదమైంది. ఈ భూమిని ప్రైవేటు సంస్థకు సరైన ప్రక్రియ లేకుండా కేటాయించారని, పారదర్శకత లేకపోవడం, సుప్రీం కోర్టు సూత్రాలను ఉల్లంఘించారని పిటిష‌న‌ర్లు వాదించారు. ఐఏఎంసీ తరపున అడ్వొకేట్ జనరల్ వాదిస్తూ, ఈ సెంటర్ ఒక పబ్లిక్-స్పిరిటెడ్ సంస్థగా ఉందని, దీని బోర్డు ఆఫ్ ట్రస్టీస్‌లో తెలంగాణ హైకోర్టు ప్రధాన న్యాయమూర్తి, న్యాయ శాఖ మంత్రి వంటి కీలక వ్యక్తులు ఉన్నారని, ఇది జవాబుదారీతనం, విశ్వసనీయతను నిర్ధారిస్తుందన్నారు.
అయినప్పటికీ, కోర్టు ఈ వాదనలను తిరస్కరించింది. భూమి కేటాయింపు చట్టవిరుద్ధమని, తెలంగాణ ల్యాండ్ రెవెన్యూ యాక్ట్, ఆంధ్రప్రదేశ్ రాష్ట్ర భూమి రాయితీ నిబంధనలు-1975ను ఉల్లంఘించినట్లు తీర్పు ఇచ్చింది. ఈ కేటాయింపు సుప్రీం కోర్టు ఆదేశాలను కూడా ఉల్లంఘించిందని కోర్టు పేర్కొంది.
