బ‌న్నీ ట్రిపుల్ రోల్ ధమాకా? అట్లీతో చిత్రంలో బిగ్ సర్‌ప్రైజ్!

టాలీవుడ్ ఐకాన్ స్టార్ అల్లు అర్జున్ (Allu Arjun) అభిమానులకు శుభ‌వార్త అందించారు. ‘పుష్ప 2: ది రూల్’ (Pushpa 2: The Rule) సంచలన విజయం తర్వాత, అల్లు అర్జున్ ప్రముఖ దర్శకుడు అట్లీ (Atlee)తో కలిసి ఓ భారీ బడ్జెట్ సూపర్‌హీరో చిత్రం కోసం సన్నద్ధమవుతున్నారు. ఈ సినిమా ‘AA22xA6’ వ‌ర్కింగ్ టైటిల్‌తో ప్రారంభం కానుంది. ఈ ప్రాజెక్ట్‌లో అల్లు అర్జున్ ట్రిపుల్ రోల్‌లో కనిపించనున్నారనే టాక్ ఫిల్మ్ సర్కిల్స్‌లో హల్‌చల్ చేస్తోంది. ఒకవేళ ఇది నిజమైతే, ఇది అల్లు అర్జున్ కెరీర్‌లో బిగ్గెస్ట్‌ ప్రయోగాత్మ‌క చిత్రం కానుంది.

ట్రిపుల్ రోల్‌తో సరికొత్త లుక్స్
ఇప్పటివరకు ఈ చిత్రంలో అల్లు అర్జున్ డబుల్ రోల్‌లో (ఒక హీరో, ఒక విలన్‌గా) కనిపిస్తారని వార్తలు వచ్చాయి. అయితే, తాజా సమాచారం ప్రకారం, ఆయన మూడు విభిన్న పాత్రల్లో నటించనున్నారని ఫిల్మ్‌నగర్ టాక్. ఈ పాత్రల కోసం అల్లు అర్జున్ పూర్తిగా కొత్త లుక్స్‌ను సిద్ధం చేస్తున్నారట. సెలబ్రిటీ ఫిట్‌నెస్ ట్రైనర్ లాయిడ్ స్టీవెన్స్ (Lloyd Stevens) సహాయంతో ఆయన తీవ్రమైన శారీరక, మానసిక శిక్షణ తీసుకుంటున్నారు. అల్లు అర్జున్ ఈ పాత్రల కోసం లుక్ టెస్ట్‌లు, కాన్సెప్ట్ షూట్‌లలో బిజీగా ఉన్నారు. ఒక పాత్ర వారియర్‌గా, మరొకటి విలన్‌గా, ఇంకొకటి సూపర్‌హీరోగా ఉండవచ్చని ఊహాగానాలు సాగుతున్నాయి. ఈ మూడు పాత్రలు పూర్తిగా విభిన్నమైన లక్షణాలు, శారీరక రూపాలతో రూపొందుతున్నాయని, అట్లీ ఈ ప్రాజెక్ట్‌లో అల్లు అర్జున్‌ను సరికొత్త అవతార్‌లో ప్రజెంట్ చేయనున్నారని టాక్.

రూ. 800 కోట్ల బడ్జెట్‌తో భారీ ప్రాజెక్ట్
సన్ పిక్చర్స్ నిర్మిస్తున్న ఈ చిత్రం రూ. 800 కోట్ల‌ బడ్జెట్‌తో రూపొందుతోంది, ఇది భారతీయ సినిమా చరిత్రలో రెండవ అత్యంత ఖరీదైన చిత్రంగా నిలుస్తుంది. ఈ బడ్జెట్‌లో రూ. 250 కోట్లు అత్యాధునిక VFX, CGI కోసం ఖర్చు చేయనున్నారు. హాలీవుడ్ స్టూడియోలైన ఐరన్‌హెడ్ స్టూడియో, జేమ్స్ మాడిగన్ వంటి టాప్ టెక్నీషియన్స్ ఈ ప్రాజెక్ట్‌లో భాగమవుతున్నారు. అల్లు అర్జున్ ఈ చిత్రం కోసం రూ. 175 కోట్ల పారితోషికంతో పాటు 15% లాభాల్లో వాటాను పొందుతున్నారని, అట్లీకి రూ. 100 కోట్ల రెమ్యూనరేషన్ లభిస్తుందని వార్తలు వినిపిస్తున్నాయి.

ఈ చిత్రం షూటింగ్ డిసెంబర్ 2025లో ప్రారంభమై, సుమారు ఏడాది పాటు VFX, పోస్ట్-ప్రొడక్షన్ పనులు జరుగుతాయని సమాచారం. సంక్రాంతి 2027లో ఈ సినిమా గ్రాండ్ రిలీజ్‌కు సిద్ధమవుతోంది. అట్లీ ఈ చిత్రాన్ని పాన్-ఇండియా స్పెక్టాకిల్‌గా, అంతర్జాతీయ స్థాయి విజువల్స్‌తో, భారతీయ భావోద్వేగాలతో రూపొందిస్తున్నారని అల్లు అర్జున్ WAVES సమ్మిట్ 2025లో వెల్లడించారు.

అభిమానుల్లో ఉత్సాహం
‘పుష్ప 2’తో పాన్-ఇండియా స్టార్‌డమ్‌ను సొంతం చేసుకున్న అల్లు అర్జున్ నుంచి వస్తున్న ఈ భారీ ప్రాజెక్ట్ అభిమానుల్లో భారీ అంచనాలను రేకెత్తిస్తోంది. సోషల్ మీడియాలో ఈ ట్రిపుల్ రోల్ ఊహాగానాలు వైరల్ అవుతున్నాయి. “అల్లు అర్జున్ సూపర్‌హీరో లుక్ ఇదేనా?” అంటూ ఓ ఎక్స్ పోస్ట్‌లో అభిమానులు ఉత్సాహంగా చర్చించుకుంటున్నారు. అయితే, చిత్ర యూనిట్ ఇంకా ట్రిపుల్ రోల్‌పై అధికారిక ప్రకటన చేయలేదు, త్వరలో క్లారిటీ వచ్చే అవకాశం ఉంది.