‘భూసర్వేపై చంద్రబాబు క్రెడిట్‌ చోరీ.. చ‌రిత్ర‌ను ఎవ‌రూ చెర‌ప‌లేరు’

ఆంధ్రప్రదేశ్‌ (Andhra Pradesh)లో సమగ్ర భూరీసర్వే (Land Resurvey) అంశంపై టీడీపీ(TDP) అధినేత చంద్రబాబు నాయుడు (Chandrababu Naidu) వ్యవహరిస్తున్న తీరుపై మాజీ ముఖ్యమంత్రి (Former Chief Minister), వైసీపీ పార్టీ (YSRCP) అధ్యక్షుడు వైఎస్ జగన్‌మోహన్‌రెడ్డి (YS Jagan Mohan Reddy) తీవ్ర స్థాయిలో విమర్శలు చేశారు. వైయస్సార్‌సీపీ కేంద్ర కార్యాలయంలో మీడియాతో మాట్లాడిన ఆయన, రీసర్వే వంటి మహత్తర కార్యక్రమానికి సంబంధించి చేయని పనికి చంద్రబాబు క్రెడిట్‌ (Credit) తీసుకునే ప్రయత్నం చేస్తున్నారని ఆరోపించారు.

నాలుగు సార్లు ముఖ్యమంత్రిగా పనిచేసిన చంద్రబాబుకు తన పాలనలో ఒక్కసారైనా సమగ్ర భూరీసర్వే చేయాలన్న ఆలోచన రాలేదని జగన్ వ్యాఖ్యానించారు. ప్రజల కష్టాలు, రైతుల భూమి వివాదాలు పరిష్కరించాలన్న చిత్తశుద్ధి ఎప్పుడూ చూపని చంద్రబాబు, ఇప్పుడు పూర్తిగా అమలైన రీసర్వే ఘనతను తన ఖాతాలో వేసుకోవడం దురదృష్టకరమని అన్నారు.

రీసర్వే ఒక మహాయజ్ఞం
ఆంధ్రప్రదేశ్‌లో సమగ్ర రీసర్వే ప్రక్రియకు 2020 డిసెంబరు 21న శ్రీకారం చుట్టామని జగన్ గుర్తు చేశారు. దాదాపు 100 ఏళ్ల తర్వాత చేపట్టిన ఈ కార్యక్రమం రాష్ట్ర చరిత్రలోనే ఒక అరుదైన ఘట్టమని పేర్కొన్నారు. అంతకు ముందు 1923లో బ్రిటిష్ పాలనలో మాత్రమే భూసర్వే జరిగిందని తెలిపారు. భూములపై వివాదాలు లేకుండా పారదర్శకంగా సర్వే నిర్వహించడం, భూరికార్డులను ఫిజికల్‌ మరియు డిజిటల్ రూపాల్లో ట్యాంపర్ చేయలేని విధంగా భద్రపరచడం, రైతులకు క్లియర్ టైటిల్ కల్పించడం ఈ రీసర్వే ప్రధాన లక్ష్యాలుగా అమలు చేశామని చెప్పారు. ఈ మొత్తం ప్రక్రియకు ప్రభుత్వమే పూచీకత్తుగా నిలిచిందన్నారు.

ఆధునిక సంస్కరణలు
పట్టాదార్ పాస్‌బుక్స్‌లో క్యూఆర్ కోడ్‌ను పొందుపరచడం, భూముల క్రయవిక్రయాలు జరిగిన వెంటనే ఆటోమేటిక్ మ్యూటేషన్, సబ్‌డివిజన్ జరిగేలా వ్యవస్థను రూపొందించడం, గ్రామ సచివాలయాల నుంచే రిజిస్ట్రేషన్లు జరగేలా చర్యలు తీసుకోవడం వంటి విప్లవాత్మక సంస్కరణలు వైసీపీ హ‌యాంలోనే అమలయ్యాయని జగన్ వివరించారు. అన్ని లావాదేవీలపై రియల్‌టైమ్ అలర్ట్స్ వచ్చేలా వ్యవస్థ ఏర్పాటు చేసినట్లు తెలిపారు.

లోతైన సమీక్షలు, విస్తృత ఏర్పాట్లు
రీసర్వే అమలుపై అత్యంత లోతైన సమీక్షలు నిర్వహించామని, 2022 మార్చి 31న జరిగిన రివ్యూలో పట్టాదార్ పాస్‌బుక్స్ ఎక్కడా ట్యాంపరింగ్ జరగకుండా చర్యలు తీసుకోవాలని ఆదేశాలు ఇచ్చినట్లు జగన్ గుర్తుచేశారు. ప్రజలకు మేలు చేయాలన్న లక్ష్యంతో ఈ కార్యక్రమాన్ని అత్యంత కఠినంగా అమలు చేశామని చెప్పారు. ఈ మహాయజ్ఞం కోసం రాష్ట్రవ్యాప్తంగా దాదాపు 15 వేల గ్రామ సచివాలయాలు ఏర్పాటు చేయడం, ఒక్కో సచివాలయంలో సగటున 10 మంది ఉద్యోగులను నియమించడం జరిగిందన్నారు. మొత్తం మీద 1.34 లక్షల మంది ఉద్యోగులు, దాదాపు 40 వేల మంది సర్వేయర్లు, డిజిటల్ అసిస్టెంట్లు ఈ రీసర్వేలో పాల్గొన్నారని తెలిపారు.

సర్వే ఆఫ్ ఇండియా, ప్లాటినమ్ గ్రేడింగ్
2020 డిసెంబరు 9న సర్వే ఆఫ్ ఇండియాతో ఒప్పందం కుదుర్చుకుని, యూరప్‌లో ఉపయోగించే ఆధునిక టెక్నాలజీని రీసర్వేలో వినియోగించినట్లు జగన్ తెలిపారు. ఈ కృషికి గుర్తింపుగా కేంద్ర ప్రభుత్వం 2023 డిసెంబరు 20న పార్లమెంటులో ఏపీ రీసర్వేకు ప్లాటినమ్ గ్రేడింగ్ వచ్చినట్లు ప్రకటించిందన్నారు.

క్రెడిట్‌ మొత్తం బాబు ఖాతాలో వేసుకునే యత్నం
ఇప్పటికే పూర్తయిన రీసర్వే పనులకు సంబంధించిన క్రెడిట్‌ను చంద్రబాబు తన ఖాతాలో వేసుకునే ప్రయత్నం చేస్తున్నారని జగన్ ఆరోపించారు. కేంద్రం నుంచి వచ్చిన రూ.400 కోట్ల రాయితీ కూడా 2025 ఫిబ్రవరి 19న విడుదలైనప్పటికీ, ఆ ఘనతను తనదిగా చెప్పుకోవడం పచ్చి అబద్ధమని విమర్శించారు. పట్టాదార్ పాస్‌బుక్స్‌పై క్యూఆర్ కోడ్ తానే ప్రవేశపెట్టినట్లు చెబుతున్న మాటలు అసత్యమని అన్నారు.

పాత పాస్‌బుక్స్‌కే కొత్త రంగు
ప్రస్తుతం ప్రభుత్వం ఇస్తున్న పట్టాదార్ పాస్‌బుక్స్‌లో ఎలాంటి కొత్తదనం లేదని, గతంలో ఇచ్చిన పాస్‌బుక్స్‌కే కేవలం రంగు మార్చి ఇస్తున్నారని జగన్ విమర్శించారు. కంటెంట్ అంతా సేమ్ టు సేమ్ అని, కలర్ మాత్రమే మారిందని పీపీటీ ద్వారా కూడా చూపించామన్నారు. కొత్త పాస్‌బుక్స్‌లో అనేక తప్పులు ఉండటంతో వాటి సవరణకు ప్రజలు లంచాలు ఇవ్వాల్సిన పరిస్థితి ఏర్పడిందని ఆరోపించారు.

చరిత్రను చెరిపేయలేరు
రీసర్వే సమయంలో ఏర్పాటు చేసిన రాళ్లను తొలగించేందుకు కోట్ల రూపాయలు ఖర్చు చేయడం, వివిధ చోట్ల పేర్లను తొలగించడం వంటి చర్యలు చరిత్రను మార్చలేవని జగన్ స్పష్టం చేశారు. పేరు చెరిపేస్తే చరిత్ర మారిపోదని, ప్రజలకు వాస్తవాలు తెలుసని అన్నారు.మొత్తంగా రైతులకు మేలు చేసిన ఒక మహాయజ్ఞంలాంటి రీసర్వేను వక్రీకరించి, చేయని పనికి క్రెడిట్ తీసుకునే ప్రయత్నం ప్రజలను తప్పుదోవ పట్టించడమేనని ఆయన వ్యాఖ్యానించారు.