తమిళనాడు రాజకీయాల్లో సరికొత్త అధ్యాయం మొదలైంది. సినీ నటుడు దళపతి విజయ్ స్థాపించిన తమిళగ వెట్రి కజగం (TVK) తన తొలి ఎన్నికల్లోనే కనీవినీ ఎరుగని రీతిలో దూసుకుపోతోంది. దశాబ్దాలుగా రాష్ట్ర రాజకీయాన్ని శాసిస్తున్న ద్రవిడ పార్టీలకు షాక్ ఇస్తూ, విజయ్ పార్టీ అగ్రపథంలో దూసుకుపోతుండటంతో రాజకీయ ముఖచిత్రం ఒక్కసారిగా మారిపోయింది. ఇన్నాళ్లూ డీఎంకే (DMK), అన్నాడీఎంకే (AIADMK) మధ్యే సాగిన ద్విముఖ పోరాటాన్ని విజయ్ త్రిముఖంగా మార్చడమే కాకుండా, ఫలితాల్లోనూ మొదటి స్థానంలో నిలిచి అందరినీ ఆశ్చర్యపరిచారు.
టీవీకే ఆధిక్యం
ఈరోజు జరుగుతున్న ఓట్ల లెక్కింపులో తొలి రౌండ్ల నుంచే టీవీకే అభ్యర్థులు స్పష్టమైన ఆధిక్యాన్ని కనబరుస్తున్నారు. టీవీకే 100కు పైగా స్థానాల్లో ఆధిక్యంలో కొనసాగుతూ సింగిల్ లార్జెస్ట్ పార్టీగా అవతరించే దిశగా సాగుతోంది. అన్నాడీఎంకే సుమారు 60 నుండి 70 స్థానాల్లో ఆధిక్యంతో రెండో స్థానంలో ఉంది. అధికారంలో ఉన్న డీఎంకే కూటమి ఊహించని విధంగా మూడో స్థానానికి పడిపోయింది. ప్రస్తుతం ఈ కూటమి 40-50 స్థానాలకే పరిమితమైనట్లు కనిపిస్తోంది.
విజయ్ పోటీ చేస్తున్న తిరుచ్చి ఈస్ట్, పెరంబూరు నియోజకవర్గాల్లో ఆయన భారీ మెజారిటీతో ముందంజలో ఉన్నారు. ముఖ్యంగా యువత, మహిళా ఓటర్లు విజయ్ వైపు మొగ్గు చూపినట్లు ఫలితాల సరళిని బట్టి అర్థమవుతోంది.
ద్రవిడ కోటలో పగుళ్లు
తమిళనాడులో దాదాపు 50 ఏళ్లుగా డీఎంకే, అన్నాడీఎంకేల మధ్యే అధికారం మారుతూ వస్తోంది. అయితే, అవినీతి రహిత పాలన, ‘మార్పు’ కావాలన్న నినాదంతో విజయ్ ప్రజల్లోకి వెళ్లడం టీవీకేకు కలిసి వచ్చింది. డీఎంకే వ్యతిరేక ఓటును చీలనివ్వకుండా విజయ్ తనవైపు తిప్పుకోవడంలో సఫలమైనట్లు విశ్లేషకులు భావిస్తున్నారు.
యువత మద్దతు విజయ్ ఫ్యాన్ బేస్ ఓట్లుగా మారడం టీవీకేకు ప్రధాన బలంగా నిలిచింది. డీఎంకే ప్రభుత్వంలోని పలువురు సీనియర్ మంత్రులు టీవీకే అభ్యర్థుల చేతిలో వెనుకంజలో ఉండటం గమనార్హం. ప్రస్తుత ట్రెండ్స్ ఇలాగే కొనసాగితే, తమిళనాడులో విజయ్ ముఖ్యమంత్రి పీఠంపై కూర్చునే అవకాశాలు మెండుగా ఉన్నాయని అభిమానులు సంబరాలు చేసుకుంటున్నారు. పూర్తి స్థాయి ఫలితాలు వెలువడటానికి మరికొంత సమయం పట్టనుంది.
