తిరుమలలో మంగళవారం రాత్రి నుంచి ఎడతెరిపి లేకుండా వర్షం కురుస్తోంది. వర్షానికి తోడు చలి తీవ్రత పెరగడంతో శ్రీవారి దర్శనానికి వచ్చిన భక్తులు కొంత ఇబ్బందులు ఎదుర్కొంటున్నారు. మరోవైపు శ్రీవారి ఆలయ పరిసరాలు, మాడ వీధులను దట్టమైన పొగమంచు కమ్మేయడంతో తిరుమల కొండలు ప్రకృతి అందాలతో కనువిందు చేస్తున్నాయి. వర్షం, మంచు కలిసి ఆధ్యాత్మిక క్షేత్రానికి మరింత ఆహ్లాదకరమైన వాతావరణాన్ని తీసుకొచ్చాయి. దీంతో భక్తులు తిరుమల ప్రకృతి అందాలను ఆస్వాదిస్తున్నారు.
మరోవైపు వర్షం కారణంగా ఘాట్‌ రోడ్లపై ప్రయాణించే వాహనదారులు అప్రమత్తంగా ఉండాలని తిరుమల తిరుపతి దేవస్థానం (టీటీడీ) సూచించింది. రహదారులు తడిగా ఉండటంతో వాహనాలను నెమ్మదిగా నడపాలని, మలుపుల వద్ద ప్రత్యేక జాగ్రత్తలు తీసుకోవాలని విజ్ఞప్తి చేసింది. ముఖ్యంగా పొగమంచు కారణంగా దృశ్యమానత తగ్గే అవకాశం ఉన్నందున ముందు వెళ్తున్న వాహనాలకు తగిన దూరం పాటించాలని సూచించింది. భక్తులు వాతావరణ పరిస్థితులను దృష్టిలో ఉంచుకుని జాగ్రత్తగా ప్రయాణించాలని టీటీడీ కోరింది.
