తెలంగాణలోని కాళేశ్వరం ప్రాజెక్టులో జరిగిన అవినీతిపై దర్యాప్తును సెంట్రల్ బ్యూరో ఆఫ్ ఇన్వెస్టిగేషన్ (CBI) కి అప్పగించాలని రాష్ట్ర ప్రభుత్వం నిర్ణయం తీసుకుంది. అయితే, గత బీఆర్‌ఎస్‌ ప్రభుత్వం సీబీఐకి రాష్ట్రంలోకి నో ఎంట్రీ బోర్డు పెట్టింది. ఈ నేపథ్యంలో రేవంత్ సర్కార్ తీసుకున్న ఈ నిర్ణయం తర్వాత ఏం జరగబోతుందో, దీనికి సంబంధించిన విధానం ఎలా ఉంటుందో ఇప్పుడు చూద్దాం.
సీబీఐ ఎంట్రీకి ఉన్న అడ్డంకులు, పరిష్కారాలు
గతంలో, 2022లో అప్పటి ముఖ్యమంత్రి కేసీఆర్ ప్రభుత్వం ఒక కీలక నిర్ణయం తీసుకుంది. జీవో 51 జారీ చేసి, సీబీఐ రాష్ట్రంలో ఏ కేసునైనా విచారించాలంటే రాష్ట్ర ప్రభుత్వ అనుమతి తప్పనిసరి అని ఆదేశించింది. దీన్నే జనరల్ కన్సెంట్ ఉపసంహరణ అని అంటారు. ఇప్పుడు సీబీఐకి తిరిగి మార్గం సుగమం చేయడానికి రేవంత్ ప్రభుత్వం ఆ జీవోను సవరించడానికి సిద్ధమైంది. దీని ద్వారా, సీబీఐ విచారణకు అవసరమైన అన్ని మార్గాలను తెరిచి, రాష్ట్రంలోకి దానికి స్వాగతం పలికినట్టే అవుతుంది.
సీబీఐ విచారణ ఎలా మొదలవుతుంది?
సీబీఐకి విచారణ అప్పగించాలని అసెంబ్లీలో తీసుకున్న నిర్ణయాన్ని రాష్ట్ర ప్రభుత్వం ఒక అధికారిక లేఖ ద్వారా కేంద్ర హోం మంత్రిత్వ శాఖకు పంపనుంది. ఈ లేఖతో పాటు, కాళేశ్వరం ప్రాజెక్టుపై ఇప్పటికే జరిగిన విజిలెన్స్ ఎంక్వైరీ, పీసీ ఘోష్ కమిషన్ నివేదికలను కూడా జతచేయనుంది. ఈ పత్రాలన్నీ పరిశీలించిన తర్వాత, కేంద్ర హోం శాఖ ఆదేశాల మేరకు సీబీఐ రాష్ట్రంలోకి ప్రవేశించి, కాళేశ్వరం కేసుపై దర్యాప్తు మొదలుపెడుతుంది.
సీబీఐ విచారణలో జాప్యం, పనిభారం
ప్రస్తుతం, సీబీఐపై భారీగా పనిభారం ఉంది. దేశవ్యాప్తంగా మొత్తం 7,072 కేసులు పెండింగ్‌లో ఉండగా, వాటిలో 529 అవినీతి కేసులు ఉన్నాయి. సీబీఐలో సుమారు 1,610 ఉద్యోగుల కొరత కూడా ఉంది. ఈ కారణంగా, అనేక కేసుల్లో దర్యాప్తు జాప్యం జరుగుతోంది. కాళేశ్వరం కేసు కూడా సీబీఐకి అప్పగిస్తే, విచారణ ఎంత త్వరగా మొదలవుతుంది, నిజాలు ఎప్పుడు బయటపడతాయనేది రాజకీయ వర్గాల్లో చర్చనీయాంశంగా మారింది. అయితే, ఈ కేసు ప్రాముఖ్యత దృష్ట్యా, దీనికి ప్రాధాన్యత లభించే అవకాశం ఉంది.
