సెలబ్రిటీల జీవనశైలి అంటే చాలామందికి ఒకే అభిప్రాయం ఉంటుంది. వారు కోట్లు సంపాదిస్తారు, ఖరీదైన కార్లు, విలాసవంతమైన బంగ్లాలు, విదేశాల్లో ఆస్తులు కొనుగోలు చేస్తూ లగ్జరీ లైఫ్‌ను గడుపుతారు. నిజానికి చాలామంది స్టార్‌లు ఇలానే ఉంటారు. కానీ, ‘విశ్వనటుడు’ కమల్ హాసన్ (Kamal Haasan) మాత్రం వీరికి పూర్తిగా భిన్నంగా జీవిస్తారని ఆయన కుమార్తె, నటి శ్రుతి హాసన్ (Shruti Haasan) తాజాగా వెల్లడించింది.
ఆయనకు డబ్బు శాశ్వతం కాదు
తాజాగా ఒక ఇంటర్వ్యూలో శ్రుతి హాసన్ తన తండ్రి గురించి ఆసక్తికరమైన విషయాలు పంచుకున్నారు. “మా నాన్నకు తెలిసింది ఒక్కటే. కొత్త కాన్సెప్టులతో వచ్చే సినిమాల్లో పెట్టుబడి (Investment) పెట్టడం. ఆయనకు సాంకేతిక ప్రమాణాలున్న కథలంటే చాలా ఇష్టం. వాటి కోసం ఎంత డబ్బు ఖర్చు చేయడానికైనా ఆయన వెనకాడరు. ఎందుకంటే ఆయనకు డబ్బు శాశ్వతం కాదనే నమ్మకం ఉంది. సినిమాల ద్వారా సంపాదించిన దానికంటే పోగొట్టుకున్నదే ఎక్కువ” అని శ్రుతి చెప్పుకొచ్చింది.
విలాసాలకు దూరం.. జ్ఞానానికి దగ్గర
కమల్ హాసన్ చాలా సింపుల్ (Simple) లైఫ్‌స్టైల్‌ (Lifestyle)ను ఇష్టపడతారట. ఖరీదైన వస్తువులు, విలాసవంతమైన కార్లు, విదేశీ ఆస్తులు, భూములు కొనడంపై ఆయనకు ఆసక్తి ఉండదు. బదులుగా, ఆయన సాంకేతికతకు సంబంధించిన కొత్త విషయాలు తెలుసుకోవడానికి, కొత్త ఆలోచనలున్న దర్శకులను ప్రోత్సహించడానికి ఎక్కువ ఆసక్తి చూపుతారని శ్రుతి హాసన్ తెలిపారు. అంటే, చాలామంది స్టార్‌లు తమ సంపాదనతో స్థిరాస్తులు కూడబెట్టుకుంటుంటే, కమల్ హాసన్ మాత్రం సినిమాపై ఉన్న తన ప్రేమ కోసం, ప్యాషన్ కోసం తన సంపాదన అంతా ఖర్చు చేసే వ్యక్తి అని స్పష్టమవుతోంది. ఇది ఆయన సినీ కెరీర్‌పై ఆయనకు ఉన్న అంకితభావానికి నిదర్శనం.
