తెలంగాణ రాజకీయాల్లో(Telangana Politics) కొండా సురేఖ(Konda Surekha) బర్తరఫ్(Dismissal) వ్యవహారం కాంగ్రెస్ పార్టీలో(Congress Party) పెను దుమారం రేపుతోంది. తన తల్లి, మాజీ మంత్రి కొండా సురేఖను మంత్రి పదవి నుంచి తొలగించడంపై ఆమె కుమార్తె కొండా సుస్మిత(Konda Susmitha) తీవ్రంగా స్పందించారు. ముఖ్యమంత్రి రేవంత్ రెడ్డిపై(Revanth Reddy) విమర్శలు గుప్పిస్తూ.. తన తల్లిని అవమానించారని ఆరోపించారు. రేవంత్ రెడ్డి రాజకీయ ప్రస్థానాన్ని ప్రస్తావిస్తూ సుస్మిత కీలక వ్యాఖ్యలు చేశారు.
రేవంత్ రెడ్డి ఒకసారి జెడ్పీటీసీగా, ఒకసారి ఎమ్మెల్సీగా, ఒకసారి ఎమ్మెల్యేగా, ఒకసారి ఎంపీగా పనిచేశారని, తన తల్లి కొండా సురేఖ మాత్రం ఆరుసార్లు ఎమ్మెల్యేగా గెలిచారని ఆమె గుర్తుచేశారు. తాను పార్టీకి వ్యతిరేకంగా ఎలాంటి వ్యాఖ్యలు చేయలేదని కొండా సుస్మిత స్పష్టం చేశారు. కేవలం ఒక వ్యక్తికి వ్యతిరేకంగా మాత్రమే మాట్లాడానని, తన వ్యాఖ్యలకు తన తల్లిని బాధ్యురాలిని చేసి మంత్రి పదవి (Ministerial Post) నుంచి తొలగించడం సరికాదని ఆమె ప్రశ్నించారు.
బీజేపీ(BJP) ఎంపీ బండి సంజయ్ కుమారుడిపై (Bandi Sanjay Son) పోక్సో కేసు(POCSO Case) నమోదైన సందర్భాన్ని కూడా సుస్మిత ప్రస్తావించారు. కుమారుడు చేసిన తప్పుకు తండ్రి బండి సంజయ్‌ను ఎలా అరెస్ట్ చేస్తారని అప్పట్లో రేవంత్ రెడ్డి ప్రశ్నించారని ఆమె పేర్కొన్నారు. అదే విధంగా తాను చేసిన వ్యాఖ్యలకు తన తల్లి కొండా సురేఖను ఎలా బాధ్యురాలిని చేస్తారని ప్రశ్నించారు.
రేవంత్ రెడ్డి బీసీలను(BCs)టార్గెట్ చేస్తున్నారని కొండా సుస్మిత ఆరోపించారు. తన తల్లిపై తీసుకున్న చర్య కూడా అదే కోణంలో చూస్తున్నామని ఆమె వ్యాఖ్యానించారు. తన తల్లి రాజకీయ ప్రస్థానం, ప్రజల్లో ఉన్న ఆదరణను ప్రస్తావిస్తూ సుస్మిత రేవంత్ రెడ్డి తీరుపై తీవ్రస్థాయిలో మండిపడ్డారు. కొండా సురేఖను మంత్రి పదవి నుంచి తొలగించడంపై ఆమె చేసిన వ్యాఖ్యలు తెలంగాణ రాజకీయ వర్గాల్లో చర్చకు దారితీశాయి.
