వికారాబాద్ జిల్లా పర్యటనలో ముఖ్యమంత్రి రేవంత్ రెడ్డి (Revanth Reddy) తన సొంత నియోజకవర్గమైన కొడంగల్ను (Kodangal) దేశానికే ఆదర్శంగా నిలిచే “మోడల్ కాన్స్టిట్యూయెన్సీ”(Model Constituency)గా తీర్చిదిద్దుతామని ప్రకటించారు. రూ.110 కోట్ల వ్యయంతో చేపట్టనున్న శ్రీవేంకటేశ్వరస్వామి ఆలయ (Sri Venkateswara Swamy Temple) పునర్నిర్మాణ పనులకు భూమిపూజ చేసిన సీఎం, లగచర్లను ప్రతిష్టాత్మక ఎడ్యుకేషనల్ హబ్గా అభివృద్ధి చేస్తామని వెల్లడించారు. విద్యార్థులకు అత్యున్నత విద్యావకాశాలు కల్పించడం తమ ప్రభుత్వ లక్ష్యమని పేర్కొంటూ, కొడంగల్ నుంచే దౌల్తాబాద్, కోస్గి ప్రాంతాల ఆలయాల అభివృద్ధి పనులకు రిమోట్ ద్వారా శంకుస్థాపన చేశారు. అభివృద్ధి, విద్య, ఆధ్యాత్మికత—ఈ మూడు రంగాల్లో కొడంగల్ను రాష్ట్రంలోనే ప్రత్యేకంగా నిలబెట్టే దిశగా ప్రభుత్వం ముందుకు సాగుతోందని సీఎం స్పష్టం చేశారు.
అదే సమయంలో సాగునీటి అంశంపై కూడా సీఎం కీలక వ్యాఖ్యలు చేశారు. “కొడంగల్ భూములు కృష్ణా జలాలతో తడవాలి అనేది నా చిరకాల కల” అంటూ అధికారులకు పనులు వేగవంతం చేయాలని ఆదేశించారు. కృష్ణా జలాలు వచ్చే వరకు జిల్లా ఇన్చార్జ్ మంత్రి దామోదర రాజనర్సింహ(Damodar Rajanarasimha), మంత్రి శ్రీహరిని (Srihari) నిద్రపోనీయొద్దని స్థానిక నేతలకు సరదాగా చెప్పినా, ప్రాజెక్టుల పూర్తి విషయంలో తన ప్రభుత్వ కట్టుబాటును స్పష్టంగా తెలియజేశారు. గతంలో కొడంగల్ నియోజకవర్గానికి మంత్రి పదవి కూడా దక్కలేదని, ఇప్పుడు అదే ప్రాంత ఎమ్మెల్యే ముఖ్యమంత్రి కావడం ప్రజల ఆశీర్వాదమేనని పేర్కొన్న రేవంత్ రెడ్డి, కొడంగల్ను అన్ని రంగాల్లో నంబర్ వన్ నియోజకవర్గంగా మార్చి ప్రజల రుణం తీర్చుకుంటానని హామీ ఇచ్చారు.
