తమిళనాడు (Tamil Nadu) రాజకీయాల్లో మరో కీలక పరిణామం చోటుచేసుకుంది. ప్రముఖ నటుడు, మక్కల్ నీది మయ్యం (ఎంఎన్ఎం) (Makkal Needhi Maiam – MNM) పార్టీ అధ్యక్షుడు కమల్హాసన్ (Kamal Haasan)ను రాజ్యసభ (Rajya Sabha)కు నామినేట్ చేస్తున్నట్లు డీఎంకే (DMK) అధికారికంగా ప్రకటించింది. 2024 లోక్‌సభ ఎన్నికల సందర్భంగా ఎంఎన్ఎం-డీఎంకే (MNM-DMK) మధ్య కుదిరిన ఒప్పందం మేరకు, కమల్‌హాసన్‌కు 2025 రాజ్యసభ ఎన్నికల్లో ఒక సీటు కేటాయించారు. ఈ నిర్ణయం తమిళనాడు రాజకీయాల్లో డీఎంకే వ్యూహాత్మక అడుగుగా చర్చనీయాంశమైంది.
ఒప్పందం నేపథ్యం..
2024 లోక్‌సభ ఎన్నికల్లో ఎంఎన్ఎం డీఎంకే నేతృత్వంలోని ఇండియా కూటమి (India Alliance)కి మద్దతు ప్రకటించింది. ఈ ఒప్పందంలో భాగంగా, కమల్హాసన్ తమిళనాడులోని 39 లోక్‌సభ నియోజకవర్గాలతో పాటు పుదుచ్చేరి (Puducherry)లోని ఒక సీటులో కూటమి అభ్యర్థుల తరఫున ప్రచారం చేశారు. ఈ సహకారానికి బదులుగా, డీఎంకే ఎంఎన్ఎంకు 2025 రాజ్యసభ ఎన్నికల్లో ఒక సీటు కేటాయించింది. ఈ ఒప్పందం డీఎంకే అధ్యక్షుడు, తమిళనాడు ముఖ్యమంత్రి ఎం.కె. స్టాలిన్ (M.K. Stalin), కమల్హాసన్ మధ్య చెన్నై (Chennai)లోని డీఎంకే ప్రధాన కార్యాలయంలో ఖరారైంది.
రాజకీయ ప్రాధాన్యత
తమిళనాడు అసెంబ్లీలో డీఎంకే 134 సీట్లతో బలమైన స్థితిలో ఉంది. 2025 జూన్ 19న జరిగే రాజ్యసభ ఎన్నికల్లో ఆరు సీట్లలో నాలుగు సీట్లను డీఎంకే గెలుచుకునే అవకాశం ఉంది. ఈ నాలుగు సీట్లలో ఒకటి కమల్‌హాసన్‌కు కేటాయించడం ద్వారా, డీఎంకే తమ కూటమిని బలోపేతం చేసుకోవడంతో పాటు కమల్హాసన్ లాంటి జాతీయ స్థాయి ప్రముఖుడిని ఢిల్లీ రాజకీయాల్లోకి తీసుకువచ్చే వ్యూహాన్ని అమలు చేసింది.
కమల్హాసన్ రాజకీయ ప్రయాణం..
2018లో కమల్హాసన్ ఎంఎన్ఎం పార్టీని స్థాపించారు. అయితే, 2019 లోక్‌సభ ఎన్నికల్లో, 2021 అసెంబ్లీ ఎన్నికల్లో ఎంఎన్ఎం పోటీ చేసినప్పటికీ గణనీయమైన విజయం సాధించలేకపోయింది. 2021లో కోయంబత్తూరు (సౌత్) నియోజకవర్గంలో కమల్ స్వయంగా పోటీ చేసి బీజేపీ అభ్యర్థి వనతి శ్రీనివాసన్ చేతిలో ఓడిపోయారు. ఈ నేపథ్యంలో, డీఎంకేతో జరిగిన ఈ ఒప్పందం ఆయన రాజకీయ జీవితంలో కొత్త అధ్యాయాన్ని తెరతీసింది. కమల్ హాసన్ రాజ్యసభ ప్రవేశం తమిళనాడు రాజకీయాల్లో డీఎంకే వ్యూహాత్మక చర్యగా భావిస్తున్నారు. 2026 అసెంబ్లీ ఎన్నికల నేపథ్యంలో ఈ ఒప్పందం కూటమి బలాన్ని మరింత పెంచనుంది. ఢిల్లీ రాజకీయ వేదికపై కమల్హాసన్ పాత్ర ఎలా ఉంటుందనేది ఆసక్తికరంగా మారింది.
