స్థానిక సంస్థల ఎన్నికల (Local Body Elections) నేపథ్యంలో టీడీపీ(TDP), జనసేన(Jana Sena) మధ్య అంతర్గత పోరు తీవ్రస్థాయికి చేరుకుంది. ఎమ్మిగనూరు ఎమ్మెల్యే బీవీ జయనాగేశ్వర్ రెడ్డిపై(BV Jaya Nageshwar Reddy) జనసేన ఎన్నికల సమన్వయకర్త చల్లా శ్రీ వరుణ్ (Challa Sri Varun) తీవ్రస్థాయిలో విరుచుకుపడ్డారు. కూటమి ధర్మాన్ని పూర్తిగా తుంగలో తొక్కి జనసేన(Jana Sena), బీజేపీలను(BJP) దెబ్బతీసేలా ఎమ్మెల్యే వ్యవహరించారని మండిపడ్డారు. స్థానిక ఎన్నికల్లో జనసేన అభ్యర్థులను ఓడించేందుకు టీడీపీ అభ్యర్థులను పోటీలో దించారని విమర్శించారు.
ఎమ్మిగనూరు మున్సిపల్ ఎన్నికల్లో(Municipal Elections) కూటమి ఒప్పందం ప్రకారం జనసేనకు 13 వార్డులు కేటాయించాల్సి ఉన్నా ఎమ్మెల్యే జయనాగేశ్వర్ రెడ్డి ఒక్క సీటు కూడా ఇవ్వలేదని చల్లా శ్రీ వరుణ్(Challa Sri Varun) ధ్వజమెత్తారు. పార్టీ ఆదేశాల మేరకు ఆరు వార్డుల్లో జనసేన అభ్యర్థులు నామినేషన్లు దాఖలు చేయగా, ఐదు చోట్ల టీడీపీ(TDP) అభ్యర్థులను పోటీలో నిలబెట్టి జనసేన ఓటమికి కారణమయ్యారని మండిపడ్డారు. మిత్రపక్షంగా ఉన్న జనసేనను బలోపేతం చేయాల్సింది పోయి, రాజకీయంగా దెబ్బతీసేందుకు ఎమ్మెల్యే ప్రయత్నించారని విమర్శించారు.
ఎంపీటీసీ(MPTC), జడ్పీటీసీ(ZPTC) ఎన్నికల్లోనూ ఎమ్మెల్యే జయనాగేశ్వర్ రెడ్డి (Jaya Nageshwar Reddy) కూటమి ధర్మాన్ని పాటించలేదని చల్లా శ్రీ వరుణ్ ఆగ్రహం వ్యక్తం చేశారు. ఎమ్మిగనూరు జడ్పీటీసీ స్థానాన్ని జనసేనకు కేటాయించినప్పటికీ, క్రాస్ ఓటింగ్ (Cross Voting)చేయించి తమ పార్టీ అభ్యర్థిని ఓడించారని పేర్కొన్నారు. కూటమిలో భాగస్వామిగా ఉన్న జనసేన అభ్యర్థిని గెలిపించాల్సిన ఎమ్మెల్యే స్వయంగా ఓటమికి కారణమయ్యారని మండిపడ్డారు.
నందవరం, గోనెగండ్ల మండలాల్లో జనసేన తరఫున పోటీ చేసిన అభ్యర్థులకు వ్యతిరేకంగా టీడీపీ అభ్యర్థులను బరిలోకి దించారని చల్లా శ్రీ వరుణ్ విమర్శించారు. మిత్రపక్షాల మధ్య సమన్వయం లేకుండా చేసి జనసేనను రాజకీయంగా బలహీనపరిచే ప్రయత్నం చేశారని మండిపడ్డారు. స్థానిక ఎన్నికల్లో జనసేనతో(Jana Sena) పాటు బీజేపీకి కూడా నష్టం కలిగించేలా ఎమ్మెల్యే వ్యవహరించారని పేర్కొన్నారు.
ఎమ్మిగనూరు నియోజకవర్గంలో జనసేన పార్టీ జెండాలు, ఫ్లెక్సీలు, జెండా దిమ్మెలను తొలగిస్తూ పార్టీ ఉనికిని దెబ్బతీసేందుకు ప్రయత్నిస్తున్నారని చల్లా శ్రీ వరుణ్ మండిపడ్డారు. కూటమిలో భాగస్వామిగా ఉన్న పార్టీని బలోపేతం చేయాల్సింది పోయి సర్వనాశనం చేసేందుకు ప్రయత్నించడం ఏమిటని ఎమ్మెల్యేను ప్రశ్నించారు.
ఎమ్మిగనూరు నియోజకవర్గంలో ఎమ్మెల్యే జయనాగేశ్వర్ రెడ్డి (Jaya Nageshwar Reddy) వ్యవహరిస్తున్న తీరును కూటమి అగ్రనేతల దృష్టికి తీసుకెళ్తామని చల్లా శ్రీ వరుణ్ హెచ్చరించారు. స్థానిక ఎన్నికల్లో జనసేనను దెబ్బతీసేందుకు ఎమ్మెల్యే చేసిన పనులన్నింటినీ ఆధారాలతో సహా జనసేన అధినేత పవన్ కల్యాణ్, ముఖ్యమంత్రి చంద్రబాబు నాయుడు, మంత్రి నారా లోకేష్‌కు అందజేస్తామని స్పష్టం చేశారు.
కూటమి పార్టీల మధ్య సమన్వయం ఉండాల్సిన సమయంలో ఎమ్మిగనూరులో జనసేన నేత బహిరంగంగా టీడీపీ ఎమ్మెల్యేపై విమర్శలు చేయడం రాజకీయంగా చర్చనీయాంశమైంది. చల్లా శ్రీ వరుణ్ వ్యాఖ్యలపై ఎమ్మెల్యే జయనాగేశ్వర్ రెడ్డి ఎలా స్పందిస్తారన్నది ఆసక్తికరంగా మారింది.
