భారత్ (India), శ్రీలంక (Sri Lanka) సంయుక్తంగా నిర్వహించనున్న మహిళల వన్డే (Women’s ODI) ప్రపంచ కప్ షెడ్యూల్ (World Cup Schedule)లో అంతర్జాతీయ క్రికెట్ మండలి (ICC) కీలక మార్పులు చేసింది. భద్రతా కారణాల వల్ల బెంగళూరు (Bengaluru)లోని ఎం. చిన్నస్వామి స్టేడియంను ప్రపంచ కప్ ఆతిథ్య వేదికల జాబితా నుండి తొలగించింది. చిన్నస్వామి స్టేడియంలో జరగాల్సిన మ్యాచ్‌లు ఇప్పుడు నవీ ముంబైలోని డీవై పాటిల్ స్టేడియంలో జరుగుతాయని ఐసీసీ శుక్రవారం అధికారికంగా ప్రకటించింది.
చిన్నస్వామిని తొలగించడానికి గల కారణాలు
2025 ఇండియన్ ప్రీమియర్ లీగ్ (IPL)లో రాయల్ ఛాలెంజర్స్ బెంగళూరు (RCB) జట్టు టైటిల్ గెలుచుకున్న తర్వాత, ఎం. చిన్నస్వామి స్టేడియం (M. Chinnaswamy Stadium)లో విజయోత్సవ పరేడ్ జరిగింది. ఈ పరేడ్ సందర్భంగా, స్టేడియం వెలుపల జరిగిన తొక్కిసలాటలో 11 మంది దురదృష్టవశాత్తూ మరణించారు, 50 మందికి పైగా గాయపడ్డారు. ఈ సంఘటన తర్వాత, ప్రభుత్వం జస్టిస్ (Justice) జాన్ మైఖేల్ డి’కున్హా (John Michael D’Cunha) అధ్యక్షతన ఒక కమిషన్‌ను ఏర్పాటు చేసింది. కమిషన్ దర్యాప్తులో, చిన్నస్వామి స్టేడియం భారీ కార్యక్రమాలను నిర్వహించడానికి సురక్షితం కాదని తేలింది. ఈ నివేదిక ఆధారంగానే, ఐసీసీ(ICC) ఈ కఠిన నిర్ణయం తీసుకుంది.
చిన్నస్వామిలో జరగాల్సిన మొత్తం ఐదు మ్యాచ్‌లు – మూడు లీగ్ మ్యాచ్‌లు, ఒక సెమీ-ఫైనల్ మరియు భారత జట్టు ఫైనల్‌కు చేరుకుంటే టైటిల్ మ్యాచ్ కూడా – ఇప్పుడు డీవై పాటిల్ స్టేడియంలోనే జరుగుతాయి.
ప్రపంచ కప్ నాకౌట్ మ్యాచ్‌ల షెడ్యూల్
మొదటి సెమీ-ఫైనల్: అక్టోబర్ 29న గౌహతి లేదా కొలంబోలో జరుగుతుంది.
రెండవ సెమీ-ఫైనల్: అక్టోబర్ 30న నవీ ముంబైలో జరుగుతుంది.
ఫైనల్: నవంబర్ 2న కొలంబో లేదా నవీ ముంబైలో జరుగుతుంది.
పాకిస్తాన్ జట్టు సెమీ-ఫైనల్‌కు అర్హత సాధిస్తే, అది మొదటి సెమీ-ఫైనల్‌ను కొలంబోలో ఆడుతుంది. పాకిస్తాన్ ఫైనల్‌కు చేరుకుంటే, ఆ మ్యాచ్ కూడా కొలంబోలోనే జరుగుతుంది. ఒకవేళ భారత్-పాకిస్తాన్ మధ్య సెమీ-ఫైనల్ జరిగితే, ఆ మ్యాచ్ కూడా కొలంబోలోనే నిర్వహించబడుతుంది. పాకిస్తాన్ జట్టు సెమీ-ఫైనల్‌కు చేరుకోలేకపోతే, అన్ని నాకౌట్ మ్యాచ్‌లు భారతదేశంలోనే జరుగుతాయి.
