ఐటీ శాఖ అధికారులు (IT Department Officials) హైదరాబాద్ నగరం (Hyderabad City)లో మరోసారి పెద్ద ఎత్తున సోదాలు నిర్వహిస్తున్నారు. నగరంలోని ప్రముఖ హోటళ్ల చైర్మన్లు మరియు డైరెక్టర్ల నివాసాలు, కార్యాలయాలపై ఏకకాలంలో 15 చోట్ల ఈ దాడులు జరుగుతున్నాయి. ముఖ్యంగా, పాతబస్తీ కేంద్రంగా భారీ వ్యాపారం నిర్వహిస్తున్న పిస్తా హౌస్ (Pista House) మరియు షా గౌస్ (Shah Ghouse)హోటళ్లపై అధికారులు దృష్టి సారించారు.
ఈ రెండు హోటల్స్ ఏటా వందల కోట్ల రూపాయల వ్యాపారం చేస్తున్నాయి. పిస్తా హౌస్ ఓనర్లు మహమ్మద్ మజీద్ (Mohammed Majeed), మహమ్మద్ మస్తాన్ (Mohammed Mastan) నివాసాలైన రాజేంద్రనగర్ వంటి ప్రాంతాలతో పాటు, మెహిఫిల్ రెస్టారెంట్ యజమాని ఇంట్లో కూడా సోదాలు కొనసాగుతున్నాయి. ఈ సోదాల్లో ముఖ్యంగా నగరంలోని ప్రముఖ బిర్యానీ రెస్టారెంట్ చైన్లపై ఐటీ అధికారులు దృష్టి పెట్టారు.
పన్ను ఎగవేత, లావాదేవీల్లో వ్యత్యాసం గుర్తింపు
ఐటీ అధికారుల సోదాల్లో రికార్డుల్లో చూపిన ఆదాయానికి, వాస్తవ ఆదాయానికి మధ్య పెద్ద మొత్తంలో వ్యత్యాసం ఉన్నట్లు గుర్తించారు. భారీ స్థాయిలో పన్ను ఎగవేతకు పాల్పడినట్లు ఆరోపణలు రావడంతో ఈ దాడులు చేపట్టారు. హవాలా, నకిలీ లావాదేవీలు, అనుమానాస్పద ట్రాన్సాక్షన్లు జరిపినట్లు అధికారులు అనుమానిస్తున్నారు. పిస్తా హౌస్ (విదేశాలతో కలిపి 44 స్టోర్లు), షా గౌస్ (గచ్చిబౌలి, ఓల్డ్ సిటీ తదితర ప్రాంతాల్లో శాఖలు), మరియు మెహిఫిల్ రెస్టారెంట్ (నగరంలో 15 బ్రాంచీలు, యూఏఈలో ఒక బ్రాంచ్) వంటి ప్రముఖ గ్రూప్లకు చెందిన ప్రధాన కార్యాలయాలు, శాఖలు, అకౌంటింగ్ సెక్షన్లు, గిడ్డంగులు, నిర్వాహకుల ఇళ్లలో మొత్తం నాలుగు టీమ్ల సహాయంతో ఐటీ అధికారులు విస్తృతంగా తనిఖీలు నిర్వహిస్తున్నారు. కోట్ల రూపాయల విలువైన అమ్మకాల వివరాలను గోప్యంగా ఉంచినట్టు అధికారులు అనుమానిస్తున్నారు.
