ఆదర్శదంపతులుగా శాశ్వతంగా జీవించాల్సిన వివాహితులు, అనుమానాలు, గొడవల కారణంగా కఠిన నిర్ణయాలు తీసుకుంటున్నారు. విడాకులతో స‌రిపెట్టుకోకుండా క‌ట్టుకున్న‌వారిని హత్యలు చేయ‌డానికి కూడా వెనుకాడ‌టం లేదు. దేశవ్యాప్తంగా ఇలాంటి ఘటనలు పెరుగుతుండగా, తాజాగా హైదరాబాద్‌లో మరో దారుణం చోటుచేసుకుంది. అంబర్‌పేట్‌లో నివసిస్తున్న నవీన్ అనే వ్యక్తి తన భార్య రేఖపై పెట్రోల్ పోసి నిప్పంటించాడు. అనంతరం, ఈ ఘటనను ఆత్మహత్యగా చిత్రీకరించేందుకు ప్రయత్నించాడు. తీవ్రగాయాలతో చికిత్స పొందుతున్న రేఖ, చివరికి ప్రాణాలు కోల్పోయింది.
భార్య వాంగ్మూలంతో వెలుగులోకి నిజం
ఈ ఘటనలో అసలు నిజం రేఖ మరణించే ముందు ఇచ్చిన వాంగ్మూలంతో బయటపడింది. నవీన్ మద్యం మత్తులో రేఖను తరచూ వేధించేవాడు. ఆమెను చంపుతానంటూ బెదిరించేవాడు. భర్త వేధింపులను తట్టుకోలేక, రేఖ తన కుటుంబ సభ్యుల సమక్షంలో పంచాయతీ పెట్టింది. అయినప్పటికీ నవీన్ ప్రవర్తనలో మార్పు రాలేదు. గత కొద్దిరోజులుగా ఇద్దరి మధ్య తీవ్రంగా విభేదాలు కొనసాగుతున్నాయి. చివరికి నవీన్ తన భార్యను అంతమొందించాలని నిర్ణయించి, ముందుగానే పెట్రోల్ తెచ్చిపెట్టాడు. గొడవ సమయంలో అది ఆమెపై పోసి నిప్పంటించాడు. తర్వాత, ఈ ఘటనను ఆత్మహత్యగా చిత్రీకరించేందుకు తన అత్తమామలకు కాల్ చేసి “మీ కూతురు ఆత్మహత్య చేసుకుంది” అని చెప్పాడు.
తన కూతురు ఆత్మహత్య చేసుకునే వ్యక్తి కాదని అనుమానించిన తల్లిదండ్రులు వెంటనే పోలీసులకు సమాచారం ఇచ్చారు. ఆసుపత్రిలో చికిత్స పొందుతున్న రేఖ వాంగ్మూలం ఇచ్చిన తర్వాత, పోలీసులు నవీన్‌పై కేసు నమోదు చేసి దర్యాప్తు ప్రారంభించారు. ఈ ఘటన మరొకసారి కుటుంబ విభేదాలు, మద్యం ప్రభావం ఎంతటి ఘోరానికి దారితీస్తాయో రుజువు చేసింది. ఇలాంటి ఘటనలు పునరావృతం కాకుండా ఉండటానికి కఠిన చర్యలు అవసరమని నిపుణులు అభిప్రాయపడుతున్నారు.
