సౌతాఫ్రికా (South Africa) బ్యాటింగ్ దిగ్గజం ఏబీ డివిలియర్స్ (AB de Villiers) మళ్లీ బ్యాట్ పట్టనున్నాడు! వరల్డ్ ఛాంపియన్‌షిప్ ఆఫ్ లెజెండ్స్ 2025 లీగ్ (World Championship Legends 2025 League) కోసం సౌతాఫ్రికా ఛాంపియన్స్ జట్టులో కెప్టెన్‌(Captain)గా చేరనున్నాడు. ఏబీడీతో పాటు హషీమ్ ఆమ్లా, క్రిస్ మోరిస్, అల్బీ మోర్కెల్, వేన్ పార్నెల్, హార్డస్ విల్యోన్, ఆరోన్ ఫాంగిసో వంటి దిగ్గజాలు ఈ జట్టులో ఉన్నారు.
రీఎంట్రీ, తాజా ప్రదర్శన
2021 నవంబర్‌లో క్రికెట్‌లోని అన్ని ఫార్మాట్‌లకు రిటైర్మెంట్ ప్రకటించిన ఏబీడీ, ఇటీవలే ఒక ఎగ్జిబిషన్ మ్యాచ్ (Exhibition Match)లో తన సహజ శైలిలో రెచ్చిపోయాడు. ఈ ఏడాది ప్రారంభంలో జరిగిన ఆ మ్యాచ్‌లో టైటాన్స్ లెజెండ్స్ (Titans Legends) జట్టుకు ప్రాతినిధ్యం వహించిన ఏబీడీ, బుల్స్ లెజెండ్స్ (Bulls Legends)తో జరిగిన మ్యాచ్‌లో కేవలం 28 బంతుల్లో సెంచరీ (Century) సాధించాడు. ఇందులో 15 సిక్సర్లు ఉన్నాయి.
ఆ మ్యాచ్ తర్వాత ఏబీడీ తిరిగి జూలైలో బ్యాట్ పట్టనున్నాడు. వరల్డ్ ఛాంపియన్‌షిప్ ఆఫ్ లెజెండ్స్ లీగ్ కోసం సౌతాఫ్రికా ఛాంపియన్స్ జట్టు ఏబీడీని సంప్రదించగా, అతను అంగీకరించాడు. 41 ఏళ్ల ఏబీడీ, తన అభిమానుల కోసమే ఈ లీగ్‌లో ఆడటానికి ఒప్పుకున్నానని చెప్పాడు.
వరల్డ్ ఛాంపియన్‌షిప్ ఆఫ్ లెజెండ్స్ లీగ్ 2025
ఈ లీగ్ 2025 జూలైలో ఇంగ్లండ్‌లోని బర్మింగ్‌హామ్, నార్తంప్టన్, లీడ్స్, లీసెస్టర్ నగరాల్లో జరగనుంది. ఈ టోర్నీలో మొత్తం 6 జట్లు (ఇండియా ఛాంపియన్స్, దక్షిణాఫ్రికా ఛాంపియన్స్, ఆస్ట్రేలియా ఛాంపియన్స్, ఇంగ్లాండ్ ఛాంపియన్స్, వెస్టిండీస్ ఛాంపియన్స్ మరియు పాకిస్తాన్ ఛాంపియన్స్) పాల్గొంటాయి.
ఇది ఈ లీగ్ రెండో ఎడిషన్. గతేడాది జూలైలో జరిగిన తొలి ఎడిషన్‌లో యువరాజ్ సింగ్ నేతృత్వంలోని ఇండియా ఛాంపియన్స్ పాకిస్తాన్‌పై విజయం సాధించి ఛాంపియన్‌గా నిలిచింది. ఆ మ్యాచ్‌లో భారత్ పాక్ నిర్దేశించిన 157 పరుగుల లక్ష్యాన్ని 19.1 ఓవర్లలో ఛేదించింది. అంబటి రాయుడు (50), యూసఫ్ పఠాన్ (30) పరుగులు చేసి భారత్ విజయంలో కీలక పాత్ర పోషించారు.
ఏబీడీ కెరీర్ గణాంకాలు
ప్రొటీస్ విధ్వంసకర బ్యాటర్ ఏబీడీ తన కెరీర్‌లో దక్షిణాఫ్రికా తరఫున 114 టెస్టులు, 228 వన్డేలు, 78 టీ20లు ఆడి 20,014 పరుగులు చేశాడు. అంతర్జాతీయ కెరీర్‌లో 47 సెంచరీలు, 99 అర్ధ సెంచరీలు సాధించాడు. ఏబీడీ 2018లో అంతర్జాతీయ క్రికెట్ నుంచి తప్పుకున్నా, వన్డేల్లో ఇప్పటికీ అతని పేరిటే ఫాస్టెస్ట్ సెంచరీ రికార్డు (2015లో జోహన్నెస్‌బర్గ్‌లో వెస్టిండీస్‌పై 31 బంతుల్లో) ఉంది.
ఐపీఎల్‌(IPL)లోనూ ఏబీడీకి అద్భుతమైన ట్రాక్ రికార్డు ఉంది. లీగ్ ప్రారంభం నుంచి ఆడి, 2021లో రిటైరయ్యాడు. ఢిల్లీ డేర్‌డెవిల్స్ (ఇప్పుడు ఢిల్లీ క్యాపిటల్స్) మరియు రాయల్ ఛాలెంజర్స్ బెంగళూరు (RCB) తరపున ఆడిన ఇతను, 184 మ్యాచ్‌ల్లో 151.68 స్ట్రైక్-రేట్‌తో 5162 పరుగులు చేశాడు. ఇందులో 3 సెంచరీలు, 40 అర్ధ సెంచరీలు ఉన్నాయి.
