తెలంగాణ(Telangana) ప్రజలకు అన్ని రకాల వైద్య సేవలను(Medical Services) వారి సొంత జిల్లాల్లోనే తీసుకురావడమే ప్రభుత్వ లక్ష్యమని ఆరోగ్యశాఖ మంత్రి దామోదర రాజనర్సింహ (Damodara Raja Narasimha) తెలిపారు. ఇందుకోసం రాష్ట్రంలోని కమ్యూనిటీ హెల్త్ సెంటర్లు(Community Health Centres – CHCs), ఏరియా ఆసుపత్రులు(Area Hospitals), జిల్లా ఆసుపత్రులను మరింత బలోపేతం చేయనున్నట్లు వెల్లడించారు. సోమవారం సచివాలయంలో తెలంగాణ వైద్య విధాన పరిషత్‌ (TVVP) పునర్వ్యవస్థీకరణపై నిర్వహించిన ఉన్నతస్థాయి సమీక్షలో మంత్రి మాట్లాడారు.
ఆసుపత్రుల్లో మౌలిక సదుపాయాలు, స్పెషలిస్ట్ వైద్యులు, నర్సింగ్ సిబ్బంది, వైద్య పరికరాలు, రోగ నిర్ధారణ పరీక్షల సదుపాయాలను పెంచాలని అధికారులను ఆదేశించారు. ఇప్పటికే డీఎస్‌హెచ్‌ (DSH) పరిధిలోని ఆసుపత్రుల కోసం 1,616 మంది స్పెషలిస్ట్ వైద్యులను (Specialist Doctors) నియమించామని, అవసరమైన నర్సులు, టెక్నీషియన్ల నియామకాలు కూడా చేపట్టామని గుర్తుచేశారు. వైద్యులు ఉన్నప్పటికీ అవసరమైన పరికరాలు, సిబ్బంది లేక సేవలకు ఆటంకం కలగకూడదని స్పష్టం చేశారు.
30, 50, 100 పడకలు, అంతకంటే ఎక్కువ సామర్థ్యం ఉన్న ఆసుపత్రులకు అనుగుణంగా వైద్య సేవలు(Medical Services), స్పెషాలిటీ విభాగాలు, ఆపరేషన్ థియేటర్లు, ల్యాబ్‌లు (Laboratories) ఏర్పాటు చేయాలని మంత్రి సూచించారు. ఆసుపత్రులను కేంద్ర ప్రభుత్వం నిర్దేశించిన ఇండియన్ పబ్లిక్ హెల్త్ స్టాండర్డ్స్ (IPHS) మార్గదర్శకాల ప్రకారం అభివృద్ధి చేయాలని తెలిపారు. ప్రస్తుతం పనిచేస్తున్న సిబ్బంది, మంజూరైన పోస్టులు, అవసరమైన పోస్టుల వివరాలను పోల్చి సిబ్బంది కొరతను గుర్తించాలని, అదనపు నియామకాలకు ప్రతిపాదనలు సిద్ధం చేయాలని ఆదేశించారు. అలాగే ప్రతి జిల్లాలో డిస్ట్రిక్ట్ కోఆర్డినేటర్ ఆఫ్ హాస్పిటల్ సర్వీసెస్ (DCHS) కార్యాలయాలు ఏర్పాటు చేసి, ఆసుపత్రుల పనితీరు, వైద్య సేవల నాణ్యత, మౌలిక సదుపాయాలను నిరంతరం పర్యవేక్షించే వ్యవస్థను రూపొందించాలని సూచించారు. సెకండరీ హెల్త్ కేర్ వ్యవస్థను (Secondary Health Care System) బలోపేతం చేసి, నాణ్యమైన వైద్య సేవలను జిల్లాల్లోనే అందించడమే ప్రభుత్వ ఉద్దేశమని మంత్రి స్పష్టం చేశారు.
