పోలీసు అమరవీరుల సంస్మరణ దినం సందర్భంగా తెలంగాణ ముఖ్యమంత్రి రేవంత్ రెడ్డి విధి నిర్వహణలో ప్రాణత్యాగం చేసిన పోలీసులకు ఘనంగా నివాళులర్పించారు. హైదరాబాద్‌లోని గోషామహల్ పోలీస్ స్టేడియంలో నిర్వహించిన స్మారక పరేడ్‌కు ముఖ్య అతిథిగా హాజరైన సీఎం.. అమర పోలీసుల కుటుంబాలకు రాష్ట్ర ప్రభుత్వం అండగా ఉంటుందని భరోసా ఇచ్చారు. ఈ ఏడాది దేశవ్యాప్తంగా 154 మంది పోలీసులు విధి నిర్వహణలో ప్రాణాలు కోల్పోగా, వారిలో తెలంగాణకు చెందిన నలుగురు ఉన్నారని తెలిపారు. పోలీసుల సేవలు, త్యాగాలు వెలకట్టలేనివని పేర్కొన్న ఆయన.. శాంతిభద్రతల పరిరక్షణ రాష్ట్ర అభివృద్ధికి, పెట్టుబడుల ఆకర్షణకు కీలకమని స్పష్టం చేశారు.
తెలంగాణ పోలీసు శాఖను మరింత బలోపేతం చేసేందుకు 2028 నాటికి సిబ్బంది కొరతను అధిగమించి, అవసరమైన ఖాళీలను భర్తీ చేస్తామని సీఎం ప్రకటించారు. విధి నిర్వహణలో మరణించే పోలీసు అధికారుల ఎక్స్‌గ్రేషియాను రూ.40 లక్షల నుంచి రూ.కోటికి, మరణించిన హోంగార్డుల కుటుంబాలకు అందించే పరిహారాన్ని రూ.5 లక్షల నుంచి రూ.10 లక్షలకు పెంచినట్లు వెల్లడించారు. పోలీసు సిబ్బంది పిల్లలకు నాణ్యమైన విద్య అందించేందుకు మంచిరేవులలో యంగ్ ఇండియా పోలీస్ స్కూల్‌ను ప్రారంభించామని, ప్రస్తుతం అక్కడ 350 మంది విద్యార్థులు చదువుతున్నారని తెలిపారు. వచ్చే ఏడాదికి విద్యార్థుల సంఖ్య రెట్టింపు కానుందని పేర్కొన్నారు. రాష్ట్రంలో డ్రగ్స్, గంజాయి అక్రమ రవాణా, వినియోగాన్ని అరికట్టేందుకు ఈగల్ ఫోర్స్ చర్యలు తీసుకుంటోందని, కల్తీ ఆహారంపై కూడా కఠినంగా వ్యవహరించాలని అధికారులకు సూచించారు.
ప్రజలకు స్నేహపూర్వక సేవలు అందిస్తూనే నేరగాళ్ల పట్ల పోలీసులు కఠినంగా వ్యవహరించాలని సీఎం రేవంత్ రెడ్డి సూచించారు. న్యాయం కోసం పోలీస్ స్టేషన్లకు వచ్చే బాధితులను కుటుంబ సభ్యులుగా భావించి వారికి సహాయం చేయాలని పిలుపునిచ్చారు. ఈ సందర్భంగా డీజీపీ సీవీ ఆనంద్ మాట్లాడుతూ.. నక్సలిజాన్ని ఎదుర్కొనే క్రమంలో సహా ప్రజల భద్రత కోసం విధి నిర్వహణలో వందలాది మంది పోలీసులు ప్రాణత్యాగం చేశారని గుర్తుచేశారు. అమర పోలీసుల సేవలు, త్యాగాలను ఎప్పటికీ మరువలేమని పేర్కొన్నారు. పోలీసు కుటుంబాల సంక్షేమం, వారి పిల్లల విద్యకు ప్రభుత్వం తీసుకుంటున్న చర్యలు అభినందనీయమని తెలిపారు.
