గాల్లో వేలాడుతున్న విమానం (Aircraft)… కత్తితో దాడి చేస్తూ విమానాన్ని కూల్చేందుకు తెగబడిన కో-పైలట్(Co-pilot).. మరోవైపు ప్రాణభయంతో అల్లాడిపోతున్న 180 మంది ప్రయాణికులు. ఏమాత్రం తడబడినా క్షణాల్లో ఊహించని విషాదం! కానీ, ఆ కష్టసమయంలో భారతీయ రక్తం ఉడికింది. ఒంటిపై తీవ్రమైన గాయాలవుతున్నా, మృత్యువు ముంగిట నిలబడి అద్భుత ధైర్య సాహసాలు ప్రదర్శించి 180 మంది ప్రాణాలను కాపాడిన కెప్టెన్ స్మిత్ మచ్చర్ (Smit Machchhar) ఇప్పుడు దేశవ్యాప్తంగా రియల్ హీరోగా మారారు.
ఆకాశంలో అసలేం జరిగింది..?
దుబాయ్ నుంచి టెల్ అవీవ్ (Tel Aviv) (ఇజ్రాయెల్) వెళ్తున్న ఫ్లైదుబాయ్ విమానంలో ఈ ఊహించని ఘటన చోటుచేసుకుంది. విమానం మిడ్-ఎయిర్‌లో ఉండగా, ఒమన్‌కు (Oman) చెందిన కో-పైలట్ హఠాత్తుగా కత్తితో కెప్టెన్ స్మిత్ మచ్చర్‌పై దాడికి తెగబడ్డాడు. విమాన నియంత్రణను తన చేతుల్లోకి తీసుకుని, క్రాష్ చేయడానికి తీవ్రంగా ప్రయత్నించాడు. ఆ సమయంలో విమానం కేవలం సెకన్ల వ్యవధిలో వేల అడుగుల ఎత్తు నుంచి కిందకు పడిపోయింది.
అయితే, తీవ్ర గాయాలైనప్పటికీ కెప్టెన్ స్మిత్ మచ్చర్ ధైర్యాన్ని సడలనివ్వలేదు. అత్యంత క్లిష్టమైన పరిస్థితుల్లో సమయస్ఫూర్తితో వ్యవహరించి, తీవ్రంగా పోరాడుతూనే కేబిన్ సిబ్బంది సాయంతో కో-పైలట్‌ను మట్టుబెట్టారు. విమానంపై తిరిగి నియంత్రణ సాధించి, సౌదీ అరేబియాలోని తబుక్ ఎయిర్‌పోర్ట్‌లో(Tabuk Airport) సురక్షితంగా అత్యవసర ల్యాండింగ్ చేశారు.
ఎవరీ స్మిత్ మచ్చర్..?
విమానయాన అనుభవం: స్మిత్ మచ్చర్‌కు కమర్షియల్ ఫ్లయింగ్‌లో 13 ఏళ్లకు పైగా సుదీర్ఘ అనుభవం ఉంది. ఆయన బోయింగ్ 737 విమానాల్లో ఏకంగా 9,750 గంటలకు పైగా ఆకాశంలో ప్రయాణించిన రికార్డు ఉంది. గతంలో భారతదేశంలో ప్రముఖ విమానయాన సంస్థ స్పైస్‌జెట్ (SpiceJet) లో ‘లైన్ ట్రైనింగ్ కెప్టెన్’గా సుదీర్ఘ సేవలు అందించారు. 2022లో ఆయన ఫ్లైదుబాయ్ (Flydubai) సంస్థలో డైరెక్ట్ ఎంట్రీ కెప్టెన్‌గా చేరారు.
జాతీయ స్థాయిలో వెల్లువెత్తుతున్న ప్రశంసలు
గాయపడి రక్తమోడుతున్నా, తన ప్రాణాల కంటే ప్రయాణికుల ప్రాణాలే ముఖ్యమని భావించిన స్మిత్ మచ్చర్ సాహసంపై భారతదేశంతో పాటు అంతర్జాతీయంగా తీవ్రస్థాయిలో ప్రశంసలు వెల్లువెత్తుతున్నాయి. సోషల్ మీడియాలో ఆయన పేరు ట్రెండింగ్‌లో నిలిచింది. “నిజమైన భారతీయుడి ధైర్యానికి ఇది నిదర్శనం, సెల్యూట్ స్మిత్ మచ్చర్” అంటూ నెటిజన్లు, విమానయాన ప్రముఖులు ఆయన వీరత్వానికి నీరాజనాలు అర్పిస్తున్నారు.
