భారత సైనిక దళాల్లో (India Military Forces) అత్యున్నత పదవులకు కేంద్ర ప్రభుత్వం నూతన నియామకాలు చేపట్టింది. దేశ రెండవ చీఫ్ ఆఫ్ డిఫెన్స్ స్టాఫ్ (CDS) జనరల్ అనిల్ చౌహాన్ (General Anil Chauhan) పదవీ కాలం ముగియనుండటంతో, ఆయన స్థానంలో లెఫ్టినెంట్ జనరల్ ఎన్.ఎస్. రాజా సుబ్రమణిని (Lieutenant General N.S. Raja Subramani) నూతన సీడీఎస్గా (CDS) ప్రభుత్వం నియమించింది. అలాగే, భారత నౌకాదళ తదుపరి అధిపతిగా వైస్ అడ్మిరల్ కృష్ణ స్వామినాథన్ (Vice Admiral Krishna Swaminathan) బాధ్యతలు చేపట్టనున్నారు.
నూతన సీడీఎస్ రాజా సుబ్రమణి
ప్రస్తుత సీడీఎస్ జనరల్ అనిల్ చౌహాన్ మే 30న పదవీ విరమణ చేయనున్నారు. ఆయన తర్వాత బాధ్యతలు చేపట్టనున్న సుబ్రమణి, మిలిటరీ అఫైర్స్ డిపార్ట్మెంట్ సెక్రటరీగా కూడా వ్యవహరిస్తారు. 1985 డిసెంబర్లో ‘గర్వాల్ రైఫిల్స్’లో కమిషన్డ్ ఆఫీసర్గా తన ప్రస్థానాన్ని ప్రారంభించారు. నేషనల్ డిఫెన్స్ అకాడమీ (NDA) పూర్వ విద్యార్థి. లండన్లోని కింగ్స్ కాలేజీ నుండి ఎంఏ, మద్రాస్ యూనివర్సిటీ నుండి ఎం.ఫిల్ పట్టా పొందారు.
సుమారు 35 ఏళ్ల సుదీర్ఘ కెరీర్లో ఈస్టర్న్ కమాండ్ కల్నల్ జనరల్ స్టాఫ్ (ఆపరేషన్స్), రాష్ట్రీయ రైఫిల్స్ డిప్యూటీ కమాండర్, సెంట్రల్ కమాండ్ జనరల్ ఆఫీసర్ కమాండింగ్-ఇన్-చీఫ్గా పనిచేశారు. ఆర్మీకి 47వ వైస్ చీఫ్గా సేవలందించిన ఆయన, ప్రస్తుతం జాతీయ భద్రతా మండలి సెక్రటేరియట్ (NSCS)లో మిలిటరీ అడ్వైజర్గా ఉన్నారు. ఆయన సేవలకు గుర్తింపుగా పరమ విశిష్ట సేవా మెడల్ (PVSM), అతి విశిష్ట సేవా మెడల్ (AVSM), సేవా మెడల్ (SM), విశిష్ట సేవా మెడల్ (VSM) వరించాయి.
కొత్త నేవీ చీఫ్ కృష్ణ స్వామినాథన్
భారత నౌకాదళ అధిపతి అడ్మిరల్ దినేష్ కుమార్ త్రిపాఠి (Admiral Dinesh Kumar Tripathi) మే 31న పదవీ విరమణ చేయనున్నారు. ఆయన స్థానంలో వైస్ అడ్మిరల్ కృష్ణ స్వామినాథన్ బాధ్యతలు స్వీకరిస్తారు. నౌకాదళ కార్యకలాపాల్లో స్వామినాథన్కు అపారమైన అనుభవం ఉంది. ఈ నెలాఖరులోగా వీరిద్దరూ తమ బాధ్యతలను స్వీకరించనున్నారు. దేశ భద్రతా వ్యూహాలను రూపొందించడంలో మరియు మున్ముందు త్రివిధ దళాల మధ్య సమన్వయాన్ని పెంచడంలో వీరి నియామకం అత్యంత కీలకం కానుంది.
