హైదరాబాద్ నగరంలో అత్యంత రద్దీ ప్రాంతమైన జూబ్లీహిల్స్ (Jubilee Hills) రోడ్ నంబర్ 36లో (Road No. 36) గురువారం భారీ అగ్నిప్రమాదం (Major Fire Accident) సంభవించింది. స్థానికంగా ఉన్న మంగళ గౌరి షాపింగ్ మాల్ (Mangala Gauri Shopping Mall) సముదాయంలోని మాన్యవర్ (Manyavar) బట్టల షోరూంలో (Clothing Showroom) ఒక్కసారిగా మంటలు చెలరేగాయి. క్షణాల్లోనే మంటలు భవనం పై అంతస్తులకు వ్యాపించడంతో ఆ ప్రాంతమంతా దట్టమైన పొగ కమ్మేసింది. ప్రమాద సమయంలో షోరూం లోపల కస్టమర్లతో పాటు సిబ్బంది కూడా ఉండటంతో అక్కడున్న వారంతా భయాందోళనలకు గురయ్యారు.
ప్రమాదంపై సమాచారం అందుకున్న వెంటనే అగ్నిమాపక సిబ్బంది రంగంలోకి దిగారు. దాదాపు నాలుగు ఫైర్ ఇంజన్ల సహాయంతో మంటలను అదుపులోకి తెచ్చేందుకు శ్రమిస్తున్నారు. షోరూం లోపల కొంతమంది సిబ్బంది చిక్కుకుపోయినట్లు సమాచారం అందడంతో, వారిని సురక్షితంగా బయటకు తీసుకురావడానికి సహాయక చర్యలు ముమ్మరం చేశారు. భవనం కిటికీలను పగులగొట్టి పొగను బయటకు పంపే ప్రయత్నం చేస్తున్నారు. అగ్నిమాపక సిబ్బంది అప్రమత్తతతో పెను ప్రమాదం తృటిలో తప్పిందని స్థానికులు చెబుతున్నారు.
పై ఫ్లోర్లో కార్మికులు వెల్డింగ్ వర్క్ చేస్తున్నారు. ఈ క్రమంలో నిప్పురవ్వలు ఎలివేషన్ కట్టడంపై పడటంతో అగ్ని ప్రమాదం చోటు చేసుకుంది. ఈ అగ్నిప్రమాదం వల్ల రోడ్ నంబర్ 36లో భారీగా ట్రాఫిక్ జామ్ ఏర్పడింది. పోలీసులు ట్రాఫిక్ను మళ్లిస్తూ, జనం గుమిగూడకుండా చర్యలు తీసుకుంటున్నారు. ఈ ప్రమాదం వల్ల ఆస్తి నష్టం ఎక్కువగానే ఉండే అవకాశం ఉందని అధికారులు అంచనా వేస్తున్నారు. దీనిపై మరిన్ని వివరాలు తెలియాల్సి ఉంది.
