తిరుపతి (Tirupati) నుంచి సికింద్రాబాద్ (Secunderabad)కు వెళ్తున్న సెవెన్ హిల్స్ ఎక్స్‌ప్రెస్ (Seven Hills Express) (12769) రైలులో సోమవారం రాత్రి చిగిచెర్ల రైల్వే స్టేషన్ (Chigicherla Railway Station) సమీపంలో ఒక్క‌సారిగా మంటలు వ్యాపించాయి. రైలు చివరి భాగంలో గార్డు బోగీకి ముందు ఉన్న బోగీలో అకస్మాత్తుగా మంటలు (Flames) చెలరేగాయి. ఈ ఘటనను గమనించిన ప్రయాణికులు భయాందోళనతో కేకలు వేయడంతో గార్డు, లోకో పైలట్ (Loco Pilot) అప్రమత్తమయ్యారు. వెంటనే రైలును ఆపి, ప్రయాణికులు భద్రత కోసం బోగీల నుంచి కిందికి దిగారు. ఈ సంఘటన ఇటీవలి రోడ్డు, విమాన, రైలు ప్రమాదాల నేపథ్యంలో ప్రజలను మరింత భయభ్రాంతులకు గురిచేసింది.
రైల్వే సిబ్బంది సమయస్ఫూర్తితో స్పందించి మంటలను త్వరగా అదుపు చేశారు. సుమారు అరగంట పాటు రైలు నిలిచిన తర్వాత, సాంకేతిక తనిఖీలు పూర్తి చేసి, సికింద్రాబాద్ వైపు ప్రయాణాన్ని కొనసాగించింది. ఈ ఘటనలో ఎలాంటి ప్రాణ నష్టం లేదా గాయాలు సంభవించకపోవడం ఊపిరి పీల్చుకునేలా చేసింది. లోకో పైలట్, గార్డు సకాలంలో చర్యలు తీసుకోవడం వల్ల పెను ప్రమాదం త‌ప్పింది. కాగా, బ్రేకులు వేయ‌డం ద్వారా రైలు చక్రాల వద్ద మంటలు చెలరేగిన‌ట్లుగా నిర్ధారించారు.
ఈ ఘటనపై రైల్వే అధికారులు విచారణ ప్రారంభించారు. రైలు నిర్వహణలో లోపాలు లేదా సాంకేతిక లోపం వల్ల ఈ ఘటన జరిగిందా అనే కోణంలో దర్యాప్తు సాగుతోంది. ఇటీవలి కాలంలో రైలు ప్రమాదాలు పెరుగుతున్న నేపథ్యంలో, రైల్వే శాఖ భద్రతా ప్రమాణాలను మరింత కఠినతరం చేయాలని ప్రయాణికులు డిమాండ్ చేస్తున్నారు. ఈ సంఘటన రైల్వే శాఖలో సాంకేతిక నిర్వహణపై తీవ్ర చర్చకు దారితీసింది. రైల్వే శాఖ త్వరలో విచారణ నివేదికను వెల్లడించనుంది.
