అమెరికా (America), చైనా (China) దేశాల మధ్య కొద్దికాలంగా నడుస్తున్న టారిఫ్ వార్ ఉద్రిక్తతల నేపథ్యంలో, అమెరికా అధ్యక్షుడు డొనాల్డ్ ట్రంప్ (Donald Trump), చైనా అధ్యక్షుడు షీ జిన్పింగ్ (Xi Jinping)లు దక్షిణ కొరియాలోని బుసాన్ వేదికగా గురువారం సుమారు రెండు గంటలపాటు భేటీ అయ్యారు.
ఈ కీలక చర్చల అనంతరం ట్రంప్ చైనాకు ఊరటనిచ్చే ప్రకటన చేశారు. ముఖ్యంగా, ఫెంటనిల్ తయారీలో ఉపయోగించే ముడి ఉత్పత్తుల రవాణాను కట్టడి చేయడానికి జిన్పింగ్ తీవ్రంగా కృషి చేస్తారని భావిస్తున్నందున, ఫెంటనిల్‌పై చైనాపై విధించిన 20 శాతం సుంకాలను 10 శాతానికి తగ్గిస్తున్నట్లు ట్రంప్ అధికారికంగా ప్రకటించారు. ఈ తగ్గింపుతో చైనాపై ఉన్న మొత్తం టారిఫ్‌లు 57 శాతం నుంచి 47 శాతానికి దిగిరానున్నాయని ఆయన వెల్లడించారు.
జిన్‌పింగ్‌తో భేటీ ‘అద్భుతంగా’ జరిగిందని డొనాల్డ్ ట్రంప్ పేర్కొన్నారు. ఈ చర్చల్లో కేవలం టారిఫ్‌లు మాత్రమే కాకుండా, పలు కీలక అంశాలపై సానుకూల నిర్ణయాలు తీసుకున్నారు. ముఖ్యంగా, అమెరికా సోయాబీన్ ఉత్పత్తుల కొనుగోళ్లను చైనా తక్షణమే పునరుద్ధరించేందుకు అంగీకారం కుదిరింది. అంతేకాకుండా, అరుదైన ఖనిజాలకు సంబంధించిన సమస్య కూడా పరిష్కారమైందని ట్రంప్ తెలిపారు. ఇరు దేశాల మధ్య వాణిజ్య సంబంధాలను మరింత మెరుగుపరచుకోవడానికి, మరిన్ని చర్చల కోసం తాను ఏప్రిల్ నెలలో చైనాకు వెళ్తానని డొనాల్డ్ ట్రంప్ ఈ సందర్భంగా ప్రకటించారు.
