తెలంగాణలో పోలీస్ శాఖ ప్రజాభిప్రాయ సేకరణకు కొత్త మార్గాన్ని ఎంచుకుంది. ప్రజలు పోలీస్ సేవలపై తమ అభిప్రాయాలను తప్పకుండా తెలియజేసేందుకు క్యూ ఆర్ కోడ్ ద్వారా వ్యవస్థను అమలు చేస్తున్నారు. సీఐడీ ఆధ్వర్యంలో రూపొందించిన డిజిటల్ ఫీడ్‌బ్యాక్ సిస్టమ్ ద్వారా, ప్రజలు తమ అనుభవాలను తెలియజేసే వీలు క‌ల్పించారు.
క్యూ ఆర్ కోడ్ ద్వారా అభిప్రాయాలు
తెలంగాణ పోలీసులు ప్రజాభిప్రాయాన్ని సేకరించడానికి క్యూ ఆర్ కోడ్‌ను వినియోగిస్తున్నారు. క్యూ ఆర్ కోడ్ స్కాన్ చేసి పౌరులు తమ అనుభవాలను నిజాయితీగా వెల్లడించవచ్చు. ఎఫ్‌ఐఆర్‌లు, ట్రాఫిక్ ఉల్లంఘన ఈ-చలానా, పాస్‌పోర్టు వెరిఫికేషన్ తదితర సేవలపై అభిప్రాయాలను సేకరించడానికి ఈ విధానాన్ని ఉపయోగిస్తున్నారు. ప్రజలు వారి అభిప్రాయాలను ఇవ్వడం ద్వారా పోలీస్ ఠాణాల పనితీరు మెరుగుపడుతుంది అని పోలీస్ శాఖ అంచనా వేస్తుంది.
సైబర్ నేరాలపై గమనిక
తెలంగాణలో సైబర్ నేరాల సంఖ్య అధికమైంది. ఈ పరిణామం దృష్ట్యా, పోలీస్ యంత్రాంగం మరింత మందిని అప్రమత్తం చేయడానికి క్యూ ఆర్ కోడ్‌ను ఉపయోగించి సైబర్ నేరాలను గుర్తించేందుకు ప్రయత్నిస్తోంది. రాష్ట్రవ్యాప్తంగా క్యూ ఆర్ కోడ్ పోస్టర్లను తెలంగాణ డీజీపీ డాక్టర్ జితేందర్ ఆవిష్కరించారు. ఈ పోస్టర్ల ద్వారా ప్రజలు తమ అభిప్రాయాలను సులభంగా పంపించవచ్చు.
