ఆసియా కప్ (Asia Cup) కోసం భారత క్రికెట్ జట్టు (India’s Cricket Team) ఎంపిక (Selection) సెలక్టర్లకు (Selectors) పెద్ద సవాలు (Challenge)గా మారింది. సుమారు 15 స్థానాల కోసం 20 మందికి పైగా ఆటగాళ్లు పోటీ పడుతుండటంతో ఎవరిని ఎంపిక చేయాలో, ఎవరిని పక్కన పెట్టాలో తెలియక వారు తలలు పట్టుకుంటున్నారు.
ప్రస్తుతం టీ20 ఫార్మాట్‌లో సంజూ శాంసన్‌, అభిషేక్‌ శర్మ, తిలక్‌ వర్మ, సూర్యకుమార్‌ యాదవ్‌, శివమ్‌ దూబే, హార్దిక్‌ పాండ్యా, రింకూ సింగ్, అక్షర్‌ పటేల్‌ వంటి ఆటగాళ్లతో జట్టు పటిష్టంగా ఉంది. అయితే, ఇటీవల ఇంగ్లండ్‌తో జరిగిన టెస్ట్ సిరీస్‌లో అద్భుతంగా రాణించిన శుభ్‌మన్‌ గిల్‌, యశస్వి జైస్వాల్‌, శ్రేయస్‌ అయ్యర్‌, మహమ్మద్ సిరాజ్‌, బుమ్రా, వాషింగ్టన్ సుందర్ వంటి ఆటగాళ్లను కూడా జట్టులో చేర్చాల్సిన పరిస్థితి ఏర్పడింది. వీరిని చేర్చాలంటే, ఇప్పుడు ఉన్న ఆటగాళ్లలో కొందరిని తప్పనిసరిగా పక్కన పెట్టాలి. ఇదే సెలక్టర్లకు ప్రధాన సమస్యగా మారింది.
బ్యాటింగ్‌లో గందరగోళం
ముఖ్యంగా శుభ్‌మన్‌ గిల్‌ (Shubman Gill)ను జట్టులోకి తీసుకోవడం పెద్ద సవాలుగా మారింది. గిల్‌ను ఓపెనర్‌గా తీసుకుంటే, ప్రస్తుతం అద్భుతంగా రాణిస్తున్న సంజూ శాంసన్‌ లేదా అభిషేక్‌ శర్మలో ఒకరిని పక్కన పెట్టాలి. ఇది జట్టు ప్రయోజనాల దృష్ట్యా సరైన నిర్ణయం కాదని సెలక్టర్లు భావిస్తున్నారు. అలాగని, గిల్‌ను పక్కన పెట్టడం కూడా సాధ్యం కాదు. ఒకవేళ ఓపెనింగ్ కాకుండా మిగతా స్థానాల్లో ఆడించాలనుకుంటే అక్కడ కూడా ఖాళీలు లేవు. తిలక్‌ వర్మ, సూర్యకుమార్‌, శివమ్‌ దూబే, హార్దిక్‌, రింకూ సింగ్ వంటి ఆటగాళ్లంతా ఇటీవల అద్భుతమైన ప్రదర్శనతో జట్టుకు విజయాలు అందించారు. అందుకే వారి స్థానాలను కదిలించడం కూడా కష్టమే.
బౌలింగ్‌లోనూ అదే పరిస్థితి
బౌలింగ్ విభాగంలో కూడా ఇదే తరహా గందరగోళం ఉంది. షమీ స్థానంలో బుమ్రా (Bumrah) తిరిగి జట్టులోకి వస్తాడని భావిస్తున్నారు. అయితే, సిరాజ్‌ (Siraj)ను చేర్చడమే పెద్ద సమస్య. అర్షదీప్‌, బుమ్రా ఫస్ట్ ఛాయిస్ పేసర్లుగా ఉండగా, మూడో పేసర్‌ స్థానం కోసం సిరాజ్‌, ప్రసిద్ధ్‌ కృష్ణ, షమీ పోటీపడుతున్నారు. అలాగే, స్పిన్ ఆల్ రౌండర్ వాషింగ్టన్ సుందర్‌ను కూడా జట్టులో చేర్చడం ఇబ్బందిగానే ఉంది. ఈ సవాళ్ల మధ్య సెలక్టర్లు ఎవరిని ఎంపిక చేస్తారో అనేది ఆసక్తికరంగా మారింది. ఆగస్ట్ 19న జట్టును ప్రకటించే అవకాశం ఉంది.
