ప్రముఖ తెలుగు న్యూస్ ఛానల్ టీ న్యూస్‌లో సీనియర్ జర్నలిస్ట్ మరియు యాంకర్‌గా పనిచేస్తున్న స్వేచ్ఛ వోటార్కర్ (40) శుక్రవారం రాత్రి హైదరాబాద్‌లోని చిక్కడపల్లి జవహర్ నగర్‌లోని తన నివాసంలో ఆత్మహత్య చేసుకున్నారు. ఆమె తన తల్లి శ్రీదేవి, కుమార్తెతో కలిసి రామ్ నగర్‌లోని ఒక పెంట్‌హౌస్‌లో నివసిస్తున్నారు. ఈ ఘటన తెలుగు మీడియా వర్గాల్లో తీవ్ర విషాదాన్ని నింపగా, స్వేచ్ఛ ఆత్మహత్యకు పూర్ణచంద్రరావు అనే వ్యక్తితో ఉన్న వ్యక్తిగత సమస్యలే కారణమని ఆమె తండ్రి శంకర్ ఆరోపించారు. తొలుత స్వేచ్ఛ మృతిని ఆత్మహత్యగా భావించిన త‌ల్లిదండ్రులు.. కూతురు మృతిపై విచార‌ణ జ‌రిపించాల‌ని చిక్కడపల్లి పోలీసులకు ఫిర్యాదు చేశారు. స్వేచ్ఛ మృతదేహాన్ని పోస్ట్‌మార్టం కోసం గాంధీ ఆసుపత్రికి తరలించారు.
స్వేచ్ఛ వోటార్కర్ గత 18 సంవత్సరాలుగా తెలుగు మీడియాలో పనిచేస్తూ, టీవీ9, టీ న్యూస్ వంటి ఛానళ్లలో స్పెషల్ కరస్పాండెంట్, న్యూస్ ప్రెజెంటర్‌గా పేరుతెచ్చుకున్నారు. ఆమె నిర్భయమైన జర్నలిస్ట్‌గా, తెలంగాణ ఉద్యమానికి అంకితమైన వ్యక్తిగా గుర్తింపు పొందారు. శుక్రవారం సాయంత్రం ఆమె కుమార్తె పాఠశాల నుంచి ఇంటికి వచ్చినప్పుడు బెడ్‌రూమ్ తలుపు లాక్ చేయబడి ఉండటం, ఇంట్లో నుంచి ఎలాంటి స్పందన రాకపోవడంతో పొరుగువారిని సంప్రదించింది.
తలుపు బద్దలు కొట్టి చూడగా, స్వేచ్ఛ ఫ్యాన్‌కు లుంగీతో ఉరేసుకుని అపస్మారక స్థితిలో కనిపించింది. అంబులెన్స్‌లో తరలించినప్పటికీ, ఆమె అప్పటికే మరణించినట్లు పారామెడిక్స్ నిర్ధారించారు. పోలీసులు ప్రాథమికంగా దీనిని ఆత్మహత్యగా అనుమానిస్తున్నప్పటికీ, ఆమె కాళ్లు బెడ్‌కు తాకేలా కనిపించడం వంటి అంశాలు అనుమానాలను రేకెత్తిస్తున్నాయి.
స్వేచ్ఛ తన భర్త కిరణ్‌తో ఐదేళ్ల క్రితం విడాకులు తీసుకున్న తర్వాత, ఓ న్యూస్ ఛానల్‌లో కల్చరల్ ప్రోగ్రామ్ డిజైనర్‌గా పనిచేసే పూర్ణచంద్రరావుతో సహజీవనం చేస్తున్నట్లు తెలుస్తోంది. పూర్ణచంద్రరావు, స్వేచ్ఛను పెళ్లి చేసుకుంటానని హామీ ఇచ్చి, కొన్ని రోజులుగా మోసం చేసినట్లు ఆమె తండ్రి ఆరోపించారు. ఈ విషయంపై స్వేచ్ఛ తన తల్లిదండ్రులతో చర్చించినట్లు సమాచారం. పోలీసులు పూర్ణచంద్రరావు ఆచూకీ కోసం గాలిస్తున్నారు, స్వేచ్ఛ ఆత్మహత్య అనంత‌రం పూర్ణచంద్రరావు అజ్ఞాతంలోకి వెళ్లినట్లు సమాచారం. ఈ ఘటన తెలుగు జర్నలిస్ట్ సమాజాన్ని దిగ్భ్రాంతికి గురిచేసింది.
