ఆసియా కప్ 2025 కోసం ప్రకటించిన భారత జట్టు ఎంపికపై క్రికెట్ దిగ్గజం సునీల్ గావస్కర్ హర్షం వ్యక్తం చేశారు. టెస్టు కెప్టెన్ శుభ్‌మన్ గిల్‌ను తిరిగి టీ20 జట్టులోకి తీసుకుని, వైస్ కెప్టెన్సీ ఇవ్వడం సరైన నిర్ణయమని ఆయన పేర్కొన్నారు.
గావస్కర్ మాట్లాడుతూ, “ఇటీవల ఇంగ్లండ్‌లో 750కి పైగా పరుగులు సాధించిన ఆటగాడిని ఎలా విస్మరిస్తారు? గిల్‌కు వైస్ కెప్టెన్సీ ఇవ్వడం ద్వారా భవిష్యత్తులో టీ20 జట్టుకు కెప్టెన్‌గా అతడే బాధ్యతలు చేపడతాడని సెలక్టర్లు స్పష్టం చేశారు” అని అన్నారు.
గిల్ ఒత్తిడిలో కూడా అద్భుతంగా రాణించగలడని జింబాబ్వే పర్యటన, ఇంగ్లండ్ టెస్ట్ సిరీస్‌లు నిరూపించాయని గావస్కర్ తెలిపారు. ఈ ఎంపిక ఒక గొప్ప, అద్భుతమైన నిర్ణయమని ఆయన సెలక్టర్లను ప్రశంసించారు.
సెప్టెంబర్ 9 నుంచి 28 వరకు జరిగే ఆసియా కప్‌లో సూర్యకుమార్ యాదవ్ కెప్టెన్‌గా, శుభ్‌మన్ గిల్ వైస్ కెప్టెన్‌గా వ్యవహరించనున్నారు.
ఆసియా కప్ 2025 కోసం భారత జట్టు (ప్రధాన ఆటగాళ్లు):
సూర్యకుమార్ యాదవ్ (కెప్టెన్), శుభ్‌మన్ గిల్ (వైస్ల కెప్టెన్), అభిషేక్ శర్మ, తిలక్ వర్మ, హార్దిక్ పాండ్యా, శివమ్ దూబే, అక్షర్ పటేల్, జితేశ్ శర్మ, జస్‌ప్రీత్ బుమ్రా, అర్ష్‌దీప్ సింగ్, వరుణ్ చక్రవర్తి, కుల్దీప్ యాదవ్, సంజూ శాంసన్, హర్షిత్ రాణా, రింకూ సింగ్.
